Bormliż ta’ 30 sena nżamm arrestat wara li ġie mixli li fi Frar li għadda prova jisraq żewġ karozzi. Leslie Farrugia li qal li xogħlu hu li jbigħ il-ġelati, wieġeb mhux ħati għall-akkużi li prova jisraq karozza minn Wied il-Għajn u oħra minn Tax-Xbiex u li huwa riċediv.
Id-difiża mmexxija mill-avukat tal-għajnuna legali, Martin Matthew Farrugia talbet għall-ħelsien mill-arrest. Madankollu, din it-talba sabet l-oġġezzjoni tal-Prosekuzzjoni għax qalet li l-imputat mhux kredibbli u għax għandu problema tad-droga.
Il-Prosekuzzjoni qalet li barra mill-ħabs huwa mhux se jindirizza l-problema tad-droga li għandu. Il-Maġistrat Marse-Ann Farrugia li kienet qed tippresedi l-każ ċaħdet it-talba għall-ħelsien mill-arrest wara li qablet mat-teżi tal-prosekuzzjoni, dik li Farrugia mhux kredibbli.
