Nature Trust – FEE Malta, tixtieq terġa’ tappella lill-pubbliku sabiex jiġi evitat l-użu tal-bżieżaq tal-helium. Dan minħabba li jista’ jkollu impatt negattiv ħafna fuq l-annimali selvaġġi bħall-għasafar u l-fkieren.
L-NGO ilha tmexxi kampanja għal dawn l-aħħar 10 snin kontra dawn il-bżieżaq. Anke l-bijodegradabbli huma ħżiena u għalhekk qatt m’għandhom jintużaw. It-tnejn jistgħu jiġu żbaljati għall-ikel mill-għasafar u l-annimali tal-baħar ladarba jaqgħu fil-baħar.
Illum is-sezzjoni Marittima tal-AFM – ġabret fekruna mejta mill-ibħra Maltin. L-ewwel sinjali juru li l-kawża tal-mewt kienet l-inġestjoni ta’ bużżieqa. Il-fekruna kienet fekruna loggerhead żgħira ħafna ta’ 3 snin li setgħet assumiet li l-bużżieqa kienet xi bram.
