Ir-Reġina Eliżabetta ma attendietx għall-quddiesa ta’ radd il-ħajr li saret fil-Katidral ta’ Londra ddedikat lil San Pawl u li kienet fost l-avvenimenti prinċipali ta’ dawn l-erbat ijiem ta’ ċelebrazzjonijiet tas-70 sena tar-Reġina bħala l-Kap tal-monarkija.
Il-festi għal dan il-Ġublew tal-Platinum, intant, irrankaw fil-belt kapitali u bnadi oħra tar-Renju Unit u fost rapporti li r-Reġina ma setgħetx tattendi għas-servizz fil-katidral għaliex ma ħassithiex komda wara li attendiet iċ-ċelebrazzjonijiet tal-Ħamis b’konnessjoni mal-Ġublew storiku.
Intant, l-Arċisqof ta’ York, Richard Cottrell, waqt is-servizz, irringrazzja lir-Reġina għall-konsistenza tagħha bħala l-Kap tal-monarkija Britannika…Konsistenza, li, flimkien mad-dedikazzjoni kbira tagħha għal dan ir-rwol, għenitha biex isservi bħala simbolu għall-poplu għal għexieren ta’ snin u waqt li pajjiżha kien għaddej mir-riformi u bidliet kbar.
Preżenti għas-servizz f’St Paul’s Cathedral kien hemm il-membri l-oħra tal-Familja Rjali flimkien ma’ politiċi ewlenin, fosthom il-Prim Ministru Britanniku Boris Johnson. Magħhom ingħaqdu madwar 400 persuna prominenti flimkien ma’ voluntiera rinomati fid-diversi oqsma tal-pajjiż.
Minbarra l-Prinċep Charles, iben ir-Reġina u n-neputi tagħha, il-Prinċep William, attendew ukoll għas-servizz il-Prinċep Harry u martu Meghan, id-Dukessa ta’ Sussex. Din kienet anki l-ewwel dehra pubbika f’sentejn għal Harry u Meghan li qegħdin jgħixu fl-Istati Uniti u wara li huma żammew profil baxx waqt il-festi tal-Ħamis fil-kapitali.
Ir-rapporti intant qalu li r-Reġina – li għandha 96 sena — segwiet is-servizz u l-aħħar avvenimenti tal-Ġublew fuq it-televiżjoni, hi u tistrieħ fil-Kastell ta’ Windsor.
Fl-aħħar sigħat ħarġu r-riżultati ta’ stħarriġ li juri li l-maġġoranza assoluta tal-Britanniċi għadhom favur li l-pajjiż ikollu monarkija. Fil-fatt, l-istħarriġ għal YouGov wera li 62 fil-mija tan-nies li wieġbu huma favur il-monarkija waqt li 22 fil-mija biss qalu li riedu Kap tal-Istat elett – b’16 fil-mija oħra jgħidu li huma indeċiżi.
