Raġel minn Ħal Qormi ġie mixli li weġġa’ gravi lil ħuh wara li allegatament tah daqqa ta’ sikkina waqt argument fuq flixkun ilma. Ignazio Mifsud ta’ 58 sena tressaq il-Qorti taħt arrest quddiem il-maġistrat Doreen Clarke il-Ġimgħa filgħodu, akkużat li attakka lil ħuh u li kkaġunalu ġrieħi gravi mingħajr intenzjoni li joqtlu.
L-inċident seħħ nhar l-Erbgħa filgħaxija bejn is-seba’ u t-tmienja, hekk kif iż-żewġt irġiel kienu qed jieklu. L-irġiel huwa mifhum li kellhom argument dwar flixkun ilma, li eskala sal-punt li wieħed mill-aħwa ntlaqat b’sikkina li kienet fuq il-mejda.
L-Avukat Roberta Bonello, li dehret bħala avukat difensur tal-akkużat, infurmat lill-Qorti li l-klijent tagħha kien qed iwieġeb mhux ħati tal-akkużi, iżda mhux se jitlob il-ħelsien mill-arrest f’dan l-istadju. Il-Qorti għalhekk rdnat lir-raġel jinżamm arrestat u mponiet ukoll ordni ta’ protezzjoni fil-konfront tal-allegat vittma u ordnat ukoll lil Mifsud biex ma javviċinax jew jikkomunika ma’ ħuh, jekk eventwalment jingħata l-libertà proviżorja fi stadju aktar tard. L-Ispettur Eman Hayman mexxa l-prosekuzzjoni.
