Il-Partit tal-Liberali Demokratiċi f’minoranza, fl-aħħar sigħat, ressaq il-mozzjoni ta’ sfiduċja tiegħu fil-Prim Ministru Britanniku Boris Johnson. Il-mozzjoni li tressqet quddiem il-Parlament għandha tagħti lid-deputati tal-Partiti kollha l-opportunità biex jivvutaw dwar il-futur tal-Prim Ministru Britanniku.
Il-Kap tal-Lib Dems, Sir Ed Davey, fisser lil Boris Johnson bħala ‘deputat li gideb lin-nies’ b’konnessjoni mal-iskandlu tal-festini li kienu saru sentejn ilu fl-Uffiċċju tal-Prim Ministru f’Downing Street ( f’Londra) u waqt li l-poplu Britanniku kien qed jinżamm taħt lockdown minħabba l-Covid-19.
Davey qal ukoll li Boris Johnson ‘jinsab imdendel bi spaga’ u li vot ta’ sfiduċja fost il-membri kollha tal-House of Commons (f’Londra) ‘għandu jsservi bħala opportunità biex jitranġaw l-iżbalji tal-passat waqt li hu (Johnson ) iħallas il-prezz politiku dovut’.
Madankollu, it-tip ta’ vot fil-Parlament li jixtieq Ed Davey għandu jsir biss f’każ li l-Partit Laburista – bħala l-Oppożizzjoni Uffiċjali f’Londra – isejjaħ speċifikament għal dan il-proċess.
