Juan Mata qasam messaġġ ta’ addiju emozzjonali fuq il-midja soċjali wara t-tluq tiegħu minn ma’ Manchester United kien ikkonfermat il-ġimgħa li għaddiet. Qabel ma jiskadi l-kuntratt tiegħu f’Old Trafford fl-aħħar ta’ dan ix-xahar, il-United ħabbru li l-Ispanjol se jitlaq bi ‘free transfer’ fit-30 ta’ Ġunju. Dan se jimmarka t-tmiem tal-perjodu ta’ tmien snin u nofs tal-midfieldermal-club.
United għandhom pjanijiet biex jagħmlu bidliet sinifikanti fix-xenarju tal-iskwadra tal-ewwel tim dan is-sajf u diversi plejers ta’ isem kbir se jingħaqdu ma’ Mata biex iħallu l-klabb aktar tard dan ix-xahar, inklużi Paul Pogba, Jesse Lingard u Edinson Cavani. It-tluq tagħhom se jnaqqas id-daqs tal-kont tal-pagi tal-club u jwitti t-triq għal plejers ġodda fl-iskwadra tal-manager Erik ten Hag.
Għalkemm hemm bżonn li jsiru bidliet tal-massa dan is-sajf, it-tluq ta’ Mata minn Old Trafford dejjem kien se jkun emozzjonali. Huwa ingħaqad mal-klabb lura fl-2014 u rriżulta li kien favorit qawwi tal-partitarji, fejn ta 100 fil-mija kull darba li lbes il-famuż flokk aħmar. Huwa għamel 285 dehra mal-klabb, skorja 51 gowl u kien involut f’ 47 assist. Huwa rebaħ ukoll erba’ trofej matul il-karriera tiegħu fil-United, fosthom l-FA Cup u l-Europa League.
Domt xi żmien biex nipproċessa l-bidla li qed isseħħ f’ħajti u dan huwa messaġġ li għal ħafna mumenti matul l-aħħar snin qatt ma ħsibt li se nikteb,” qal Mata. “Imma, ovvjament, l-affarijiet tajbin kollha jiġu fi tmiemhom u ż-żmien tiegħi bħala plejer ta’ Manchester United għadu kif spiċċa.
“Ikun impossibbli għalija li permezz ta’ din il-kitba nesprimi s-sentimenti kollha li kont qed nesperjenza f’dawn l-aħħar ġimgħat, iżda fil-qosor, nixtieq ngħid li jien l-iktar bniedem kburi fid-dinja talli rrappreżentajt dan klabb uniku għal dawn l-aħħar tmien staġuni u nofs.
Hija xi ħaġa li qatt ma kont noħlom biha meta kont żgħir, għax kont inħossha wisq ‘il bogħod għal tifel fi Spanja biex xi ġurnata milgħab għal wieħed mill-aqwa klabbs fl-istorja tal-futbol. “Imma xi drabi r-realtà teċċedi l-ħolm. Hekk kif qed nikteb dawn il-linji llum, ma nistax inkun aktar grat b’dak li ġabitli l-karriera tiegħi s’issa u ninsab eċċitat daqs dak it-tifel ċkejken dwar dak li jista’ jġib il-futur minn issa ‘l quddiem.
“L-istess passjoni għal-logħoba tal-futbol bħal dik ta’ dak it-tifel tibqa’ ġewwa fija. M’hemmx għalfejn ngħidu li rrid nirringrazzja lil kull membru tal-istaff li jaħdem fil-klabb u li għamilha tant speċjali… kull manager u kull sieħeb li qsamt il-mogħdijiet ta’ matul iż-żmien tiegħi f’Manchester. “Ma esperjenzajniex l-aqwa perjodu fl-istorja tal-klabb imma tul it-triq kellna memorji mill-aqwa f’forma ta’ trofej u mumenti speċjali flimkien li jibqgħu għal dejjem f’moħħi.
“Grazzi lilkom ilkoll – se nimissjakom. Għalikhom, il-partitarji tagħna, ma tantx nista’ nsib kliem biex niddeskrivi kemm jien grat u kemm għamiltuni speċjali. Inħossni maħbub ħafna u din hija xi ħaġa li la jien u lanqas il-familja tiegħi qatt se nkunu grati biżżejjed.
“Manchester hija u dejjem se tkun parti kbira minn ħajti, ġewwa u barra l-grawnd, u verament inħossni ‘Mancunian’ adottat. Ngħix hawn u nifhem xi jfisser li tkun parti minn dan il-post singolari fid-dinja u l-kultura tiegħu, hija xi ħaġa tassew speċjali.
“Inħoss li nappartjeni hawnhekk. Ma nixtieq xejn ħlief l-aħjar lill-klabb u lill-manager il-ġdid, u nittama tassew li dan ikun il-bidu ta’ era ġdida mimlija futbol mill-aqwa, trofej u tgawdija għalikom, partitarji tagħna. Mhu xejn aktar minn dak li jixirqilkom u xejn inqas minn dak li għandu jkun dwar dan il-klabb tal-futbol.
“Dan mhux addiju, imma narakhom dalwaqt, peress li se nibqa’ niġi Manchester kull meta nista’. Imma għalissa, minn qalbi, grazzi ħafna talli ħallejtuni nkun parti mill-istorja tagħkom. Jien tassew onorat u kburi, u jien dejjem inkun wieħed minnkom.
