Il-Gvern Franċiż, bħalissa, għaddej minn żmenijiet bla preċedent wara li l-koalizzjoni taċ-ċentru mmexxija mill-President Emmanuel Macron tilfet l-għexieren tas-siġġijiet waqt it-tieni rawnd tal-elezzjoni għall-Assemblea Nazzjonali ta’ Pariġi.
Minn din l-elezzjoni ħarġu l-aħjar l-Alleanza politika tax-Xellug flimkien mal-estremisti tal-lemin – bl-elettorat ma jagħtix każ it-talba ta’ Macron biex il-koalizzjoni tiegħu tingħata mandat qawwi biex Franza tkun tista’ taddotta ‘il-bidliet meħtieġa’ fix-xhur u snin li ġejjin.
F’din is-sitwazzjoni, il-politika ta’ Franza spiċċat frammentata u issa kollox qed jindika li Macron se jsib l-ostakoli kbar fis-sitwazzjonijiet fejn jipprova jgħaddi xi riformi ( li wħud jinvolvi s-sistema tal-pensjonijiet) għall-approvazzjoni tal-Assemblea.
Intant, il-Prim Ministru ġdid ta’ Franza, Elisabeth Borne — li għadha kemm laħqet fil-kariga – qalet li hi qatt ma rat Assemblea Nazzjonali bħal din filwaqt li wissiet li s-sitwazzjoni qed tippreżenta element qawwi ta’ sogru għal pajjiżha.
Fl-istess ħin, l-akbar żewġ gruppi politiċi fl-Assemblea – apparti l-alleanza ta’ Macron – mhumiex interessati li jikkollaboraw mal-President fid-deċiżjonijiiet li jaffettwaw il-futur ta’ Franza.
Il-Ministru Franċiż għall-Ekonomija, Bruno Le Maire, qed jinsisti li Franza ma spiċċatx f’sitwazzjoni li tirrendi l-governanza bħala xi ħaġa impossibbli. Iżda hu ammetta li l-Amministrazzjoni ta’ Macron, fil-jiem li ġejjin, se teħtieġ ‘ħafna immaġinazzjoni’ biex tmexxi l-pajjiż ‘il quddiem.
U waqt li Macron spiċċa umiljat u f’pożizzjoni dgħajfa wara r-rawnd elettorali deċiżiv, Jean-Luc Melenchon – ir-rivali etern tiegħu u Kap tax-xellug radikali — qed igawdi din l-arja ta’ suċċess wara li rnexxielu jgħaqqad il-partiti tradizzjonali tax-xellug mal-Komunisti u l-Ħodor, bħala alleanza bl-isem ‘Nupes’.
Melenchon qal lis-sostenituri tiegħu li l-koalizzjoni tal-President Macron sofriet disfatta kbira u li issa, l-alleanza tal-istess Melenchon għandha ‘kull possibbiltà f’idejha’ peress li saret l-akbar qawwa tal-Oppożizzjoni fi Franza.
Anki Marine Le Pen u l-Partit estremista tagħha (tal-lemin) bl-isem Rally Nazzjonali jinsabu ferħanin ħafna bir-riżultat tal-Ħadd….Riżultat li jfisser konsolazzjoni kbira għal Le Pen ftit anqas minn xahrejn wara li hi kkuntestat għall-Presidenza Franċiża u tilfet kontra Macron.
Fil-fatt, ir-Rally Nazzjonali żied is-siġġijiet tiegħu fl-Assemblea minn tmienja għal 89 u li, fih innifsu, jindika t-theżżiża politika li għaddejja minnha Franza bħalissa.Marine Le Pen, fl-aħħar sigħat, qalet li ‘il-poplu tkellem’ u li l-vot għall-Assemblea jikkonferma li Emmanuel Macron se jkun qed imexxi Gvern ta’ minoranza.
Intant, xi osservaturi politiċi qalu li l-Assemblea Nazzjonali ta’ Pariġi issa qed tirrifletti aħjar il-fehmiet taċ-ċittadini Franċiżi waqt li esprimew tamiet li l-partiti ta’ kontra Macron, minkejja kollox, jiddeċiedu biex iservu bħala Oppożizzjoni kostruttiva.
