Miljuni ta’ nies madwar l-Indja u Bangladesh qed iġarrbu l-effetti ta’ għargħar qawwi li ‘ma għandu l-ebda limitu’ – bl-istess inċidenzi tal-għargħar, flimkien mal-valangi tal-art kontinwi, iħallu ‘il fuq minn mija mejtin, fost il-konsegwenzi devastanti għal għexieren ta’ komunitajiet.
Dawn iż-żewġ pajjiżi fin-naħa ta’ isfel tal-Asja – u fejn qed jgħixu ‘il fuq minn 1.3 biljuni – bħalissa għaddejjin mill-agħar elementi naturali għal snin u meta l-inċidenzi ta’ maltemp estrem qed isiru dejjem aktar frekwenti u qattiela minħabba l-bidliet fil-klima tad-dinja.
Diversi Stati tal-Indja jinsabu mgħarrqin fost sitwazzjoni ta’ emerġenza kważi bla preċedent…Sitwazzjoni, li, fost oħrajn, swiet il-qerda ta’ miljuni ta’ djar madwar il-pajjiż flimkien ma’ numru sinifikanti ta’ mejtin.
Ir-residenti tal-ibliet u l-villaġġi fl-Istat ta’ Assam, lejn il-Grigal tal-Indja, tkellmu dwar ‘iċ-ċirkustanzi tal-waħx’ wara li t-toroq imtlew bl-ilma fi spazju ta’ ftit sigħat u fejn saru jixbħu sensiela ta’ xmajjar interminabbli – bid-djar kollha jispiċċaw imfawwrin.
Sadanittant, numru sinifikanti ta’ familji spiċċaw iċċirkondati bl-ilma minn kull naħa – iżda fl-istess ħin qed jispiċċalhom l-ilma li hu tajjeb għax-xorb, l-istess bħall-ikel. Dan meta l-livelli tal-ilma kienu qed jitilgħu b’rata mgħaġġla – bil-livell ta’ periklu għall-ħajja jibqa’ wieħed ‘sostanzjali’.
L-inżul tax-xita f’Assam issa laħaq livell storiku u fejn irriżultaw il-widien ta’ qerda anki għall-art agrikolu.
L-awtoritajiet f’Assam qalu li 32 minn fost il-35 distretti spiċċaw affettwati mill-elementi. Intant, l-għargħar anki ħalla ‘il fuq minn 4.7 miljun persuna mingħajr dar għal din l-aħħar ġimgħa – bil-Gvern Indjan jiftaħ madwar 1,500 kampijiet ta’ emerġenza għar-‘refuġjati interni’.
