Pazjenti qed jispiċċaw idumu għal iktar minn sitt sigħat jistennew sabiex jarahom tabib fid-Dipartiment tal-Emerġenza fl-Isptar Mate Dei.
Persuna li tkellmet ma’ Net News stqarret kif ċemplet għall-ambulanza għall-ħabta tan-12.30 u damu madwar siegħa u nofs jistennew sakemm din waslet.
Appena waslu l-Emerġenza hemmhekk sabu sitwazzjoni tal-biki. Apparti n-numru kbir ta’ persuni jistennew fil-waiting area sabiex jinqdew, kien hemm ukoll numru ta’ pazjenti fuq stretcher f’din l-istess waiting area tal-Emerġenza.
Din il-persuna ddeskriviet din is-sitwazzjoni bħala waħda tal-mistħija hekk kif il-pazjenti spiċċaw għal diversi sigħat jistennew sakemm mar jarahom tabib… bil-konsegwenza li wħud mill-pazjenti spiċċaw jokorbu bl-uġigħ.
Persuni oħra li tkellmu ma’ Net News saħansitra qalulna li damu għal madwar 12-il siegħa jistennew sakemm jinqdew.
Dan kollu huwa turija ċara ta’ nuqqas ta’ staff f’dan id-Dipartiment… nuqqas ta’ tobba u nurses… nuqqas li qed iwassal ukoll biex l-ambulanzi qed idumu ma jaslu fuq il-post, b’detriment għas-saħħa tal-pazjenti.
//= $special ?>