Ma taqta’ xejn l-offensiva tar-Russja fuq l-Ukrajna, hekk kif matul il-lejl li għadda gew rappurtati aktar attakki bil-missili.
Fis-sigħat bikrin ta’ tas-Sibt filgħodu, instemgħu numru ta’ splużjonijiet fil-belt ta’ Mykolaiv – bis-Sindku jappella lin-nies sabiex jibqgħu fix-shelters u ma joħorġux.
Rapporti oħra qed jindikaw li anke f’Donetsk seħħew aktar attakki, b’waħda mill-missili teqred binja residenzjali.
Dan filwaqt li diversi esperti jinsabu ferm inkwetati, hekk kif l-indikazzjonijiet militari qiegħdin juru li l-armata Russa issa qabdet ritmu sostenibli bil-mod ta’ kif qiegħda tavvanza fl-Ukrajna, bil-belt ta’ Sverdonetsk taqa’ f’idejn ir-Russi aktar kmieni din il-ġimgħa.
Madankollu esperti militari komplew biex jispjegaw li dan l-avvanz militari u l-konsolidazzjoni tal-art li ġiet meħudha mill-Ukrajna, hija biss rebħa temporanja. Dan hekk kif, kemm il-Gven Ukren, kif ukoll l-esperti militari stqarru li l-irtirar tal-armata Ukrena mill-belt ta’ Sverdonetsk kienet deċiżjoni tajba, bl-armata Ukrena issa tiprepara għall-assedju li jmiss fil-belt ta’ Lysychansk.
Intant, kompliet ukoll il-battalja fejn tidħol il-provvista tal-enerġija għall-Ewropa. Fejn issa kien hemm il-konferma li għall-ewwel darba, l-Unjoni Ewropea qed timporta aktar gass mill-Istati Uniti milli mir-Russja.
Minbarra l-importazzjoni tal-gass mill-Istati Uniti, l-Unjoni Ewropea qiegħda wkoll tintroduċi diversi meżżi ġodda sabiex tassigura li fix-xitwa li ġejja l-pajjiżi Ewropej jkollom ammont sostanzjali ta’ gass maħżum sabiex id-djar Ewropej jibqgħu sħan matul ix-xitwa qalila.
