Fis-sigħat bikrin tal-Ħadd il-Gvern Ukren ikkonferma li 6 persuni inqatlu u madwar 30 persuna oħra jinsabu maqbuda taħt it-tifrik, wara li rocket mill-armata Russa laqtet binja ta’ ħames sulari fir-reġjun tad-Donetsk.
Il-Gvernatur tar-reġjun Pavlo Kyrylenko spjega fuq Telegram, li l-attakk seħħ fil-villaġġ ta’ Chasiv Yar is-Sibt filgħaxija, bir-residenti tal-villaġġ għadhom għaddejjin bit-tentattivi tagħhom biex isalvaw lil dawk li jinsabu taħt it-tifrik.
Il-Gvernatur spjega li attakki bħal dawn saru komuni fl-istat tad-Donetsk, hekk kif l-armata Russa qiegħda tkompli l-avvanzi tagħha sabiex tikkontrolla l-istat …. u sussegwentament tikkontrolla r-reġjun tad-Dombas.
Madankollu minbarra attakki ċivili, diversi sorsi mill-Ukarjna qiegħdin jirrapurtaw li matul l-ġurnata l-armata Russa laqtet diversi żoni strateġiċi bl-artillerija tagħha.
Dawn iż-żoni jinkludu żewġ hangars Ukreni ħdejn Kostantinovka fir-reġjun tad-Donetsk, li fihom kienu qiegħdin jinżammu diversi armamenti tal-Punent, inkluż l-M777 howitzers li ngħataw lill-Ukrajna mill-Istati Uniti.
Minn naħa l-oħra rapporti li bħalissa ħierġin mir-reġjun ta’ Luhansk, li issa jinsab taħt il-kontroll tal-armata Russa, qiegħdin jgħidu li 9 pulizija ġew arrestati wara li l-gvern tar-reġjun akkużhom li tradew lill-istess tmexxija.
Il-Gvern reġjonali tal-Luhansk iddikjara li matul din il-ġimgħa saru diversi intervisti mal-Pulizija tar-reġjun u instab li 1% tal-Pulizija huma possibilment tradituri, li skont il-Gvern huwa numru ferm żgħir.
Skont sorsi …..dawn l-intervisti li qiegħdin jsiru mill-Gvern ta’ Luhansk huma dikjarazzjoni ċara li r-reġjuni li se jaqaw taħt il-ħakma ta’ Putin se jerġgħu jmorru lura lejn iż-żmienijiet tal-1934 fejn kull min kien suspettat li huwa traditur tal-istat kien jew jintbagħat għomru l-ħabs, jew saħansitra kien jinqatel mill-Gvern nnifsu.
