Il-Pulizija akkużat raġel b’rabta ma’ serq f’perjodu ta’ ħames xhur li matulu allegatament wettaq aktar minn 20 serqa, li wħud minnhom kienu jinvolvu inċidenti ta’ ħsara kriminali. L-Ispetturi Gabriel Micallef, Clayton Camilleri u Mark Cremona ressqu l-Qorti Rashid Ramadan Ibrahim Aljabo ta’ 29 sena, sprayer tal-karozza mil-Libja quddiem il-Maġistrat Doreen Clarke l-Erbgħa wara nofsinhar.
Huma akkużawh li seraq kartieri, flus kontanti u oġġetti minn numru ta’ ħwienet u karozzi fil-Belt Valletta, Ħal Qormi u l-Ħamrun. Aljabo jinsab mixli wkoll li għamel ħsarat fuq ħames karozzi u li seraq oġġetti minnhom. L-Ispettur Micallef qal lill-Qorti li f’Marzu kienu ġew investigati sensiela ta’ serqiet mill-Belt Valletta bejn Marzu u Lulju u l-akkużat ġie identifikat mis-CCTV.
Huwa ġie rikonoxxut peress li kellu diversi kundanni preċedenti. Iżda Aljabo ma kellux indirizz fiss u kien irnexxielu jerġa’ iwettaq reati, f’Ħal Qormi qabel ma seta’ jiġi ntraċċat u miżmum taħt arrest. Il-Pulizija kienet irċeviet informazzjoni li kien qed joqgħod fi struttura fil-Marsa, fejn kien arrestat wara li nħareġ mandat. Ġiet reġistrata tweġiba ta’ mhux ħati fl-awla. Ma saret l-ebda talba għall-libertà proviżorja. L-avukati Franco Debono u Francesca Zarb huma l-avukat difensur tar-raġel.
