Numru kbir ta’ residenti u turisti fi Franza kienu kostretti jaħarbu mill-ibliet u l-villaġġi fost it-theddida ta’ nirien kbar li qed ikunu xprunati mill-irwiefen u kundizzjonijiet ta’ nixfa.
Is-sitwazzjoni qed taffettwa wkoll numru ta’ pajjiżi madwar il-kontinent u meta l-impatt tal-global warming qed jinħass l-aktar għall-iskwadri li qed jikkumbattu n-nirien u taqsimiet oħra tas-sigurtà ċivili fl-Istati affettwati. Fl-aħħar jiem, ‘il fuq minn 10,000 kienu sfurzati li jitilqu mir-reġjun ta’ Gironde, lejn il-grigal ta’ Franza, waqt li għexieren ta’ nirien qegħdin jaqbdu wkoll fi Spanja u l-Portugall, fejn it-temperaturi sparaw ‘il fuq mill-40 gradi Celsius.
Sadanittant, madwar 300 mewta f’dawn iż-żewġ pajjiżi qed ikunu marbutin mal-mewġa tas-sħana li qed taħkem fil-kontinent – u fost rapporti li r-residenti spiċċaw evakwati mill-ibliet lejn il-punent ta’ Spanja.
L-Italja u l-Kroazja, din il-ġimgħa, irrappurtaw inċidenzi ta’ nirien qalb il-foresti. Dan meta l-irwiefen sħan li qed jiddominaw bħalissa komplew ikabbru s-sogru ta’ nirien inkontrollabbli f’ħames reġjuni tal-Greċja.
L-emerġenza qed tidher bħala kbira wkoll għal ħafna ċittadini fil-Greċja, fost in-nirien ġodda fuq il-gżira ta’ Kreta u fil-muniċipalità ta’ Attica.
U fl-aħħar sigħat, is-servizzi għall-emerġenzi fil-Greċja wissew b’urġenza biex in-nies jaħarbu mill-villeġġa ta’ Feriza Saronikos lejn artijiet eqreb tal-kosta.
