Rapport t’awtopsja li sar fl-aħħar sigħat ikkonferma li ż-żagħżugħ ta’ 25 sena, Jayland Walker inqatel mill-Pulizija ta’ Ohio permezz ta’ 46 tir.
Il-każ seħħ fis-27 ta’ Ġunju li għadda f’Akron meta Walker kien qed jaħrab mill-Pulizija bil-karozza li kien qed isuq. F’punt minnhom, Walker ħareġ mill-karozza u beda jiġri ‘l bogħod mill-Pulizija, iżda kien hemmhekk fejn tmien uffiċjali tal- pulizija fetħu n-nar fuqu, minkejja li ż-żagħżugħ ma kienx armat.
Mill-awtopsja ħareġ kif Walker sofra feriti f’qalbu, il-pulmun u l-arterji, fost l-oħrajn.
Il-Pulizija waqfu lil Walker minħabba numru ta’ ksur ta’ liġi fit-triq, li qed ikunu meqjusa bħala xejn gravi. Mhux magħruf għalfejn iż-żagħżugħ ħarab mill-Pulizija. Madanakollu, l-awtoritajiet saħqu li Walker spara tir wieħed waqt li l-Pulizija kienu qed isuqu warajh biex jipprovaw iwaqqfuh.
