Raġel tal-Belt inżamm arrestat b’rabta ma’ inċident ta’ hit and run tal-bieraħ, li matulu l-pulizija sparaw tiri ta’ twissija. L-Ispetturi Lydon Zammit, Stephen Gulia u Rodrick Spiteri akkużaw lil Keith Cremona, ta’ 34 sena mill-Belt Valletta, bi 18-il reat, li jinkludu ħsara f’karozza tal-pulizija, ġrieħi ħfief fuq żewġt irġiel, sewqan perikoluż, u ħsara fuq tliet muturi fis-sigħat bikrin tal-20 ta’ Lulju fil-Marsa.
Cremona kien akkużat ukoll li saq il-Hyundai Lantra tiegħu mingħajr liċenzja jew kopertura tal-assigurazzjoni, li naqas li jieqaf wara li kien involut f’inċident tat-traffiku u li rrifjuta li jagħti d-dettalji tiegħu, li naqas li jieqaf f’dawl aħmar, u li saq fuq in-naħa ħażina tat-triq.
Akkużi oħra għandhom x’jaqsmu mal-pussess ta’ eroina u li ma obdiex ordnijiet leġittimi tal-pulizija, li ġarr ta’ strument li jaqta’ u bil-ponta fil-pubbliku mingħajr liċenzja, li kiser il-kundizzjonijiet tal-pleġġ u l-kundizzjonijiet ta’ ordni ta’ probation u li sar riċediv.
Il-Qorti ntalbet ukoll tiskwalifika lil Cremona milli jsuq u toħroġ ordni ta’ protezzjoni favur il-persuni involuti. Cremona, li qal lill-Qorti li kien jaħdem f’negozju tal-familja, wieġeb mhux ħati. F’dan l-istadju ma ntalbitx il-libertà proviżorja, bl-avukat difensur tiegħu jitlob lill-qorti timponi ordni ta ‘trattament biex tittratta dik li kienet deskritta bħala “problema kronika tad-droga.” L-avukati David Gatt u Ishmael Psaila dehru bħala avukati difensuri tal-akkużat.
