Il-Qorti Kostituzzjonali ċaħdet appell ippreżentat minn priġunier tal-ħabs u l-eks sieħba tiegħu, li fih kienet intalbet iżid l-ammont ta’ kumpens mogħti lilhom minħabba ksur ta’ drittijiet li seħħ meta ġie rifjutat leave tal-ħabs biex jiżżewwġu. Yousef Essesi u Meliza Muscat kienu fetħu proċeduri kontra d-Direttur tal-Faċilità Korrettiva ta’ Kordin fl-2019, fejn sostnew li sofrew ksur tad-dritt tagħhom għall-ħajja privata u tal-familja, wara li l-awtoritajiet tal-ħabs irrifjutaw it-talba ta’ Essesi għal leave tal-ħabs, minħabba l-imġieba ħażina tiegħu.
Fir-rikors tal-qorti, Essesi kien sostna wkoll li kien suġġett għal trattament degradanti u inuman. Iżda l-qorti kienet semgħet ukoll kif, matul iż-żmien li għamel il-ħabs, Essesi kien involut f’bosta ġliediet ma’ sħabu l-ħabs u kien irċieva żmien addizzjonali ta’ ħabs talli aggredixxa gwardjan tal-ħabs.
Essesi kellu mill-inqas 107 każ dixxiplinarju pendenti quddiem id-direttur tal-ħabs fiż-żmien li ġie ppreżentat il-każ. F’dak il-każ kien xehed l-eks direttur tal-ħabs il-Kurunell Alexander Dalli, fejn spjega li l-leave tal-ħabs jingħata fid-diskrezzjoni tad-direttur tal-ħabs u li kien iddeċieda li ma jagħtix leave lil Essesi, minħabba “l-aġir totalment mhux dinjituż tiegħu fil-ħabs.”
Il-każ sar suġġett ta’ diskussjoni nazzjonali wara li l-għarusa ta’ Essesi kienet dehret fuq il-programm popolari televiżiv Xarabank fi sforz biex titqajjem kuxjenza dwar l-ostakli li kienu qed jiffaċċjaw. Fuq il-programm Muscat kienet qasmet l-istorja tagħha fejn kienet qalet li rabtet qalbha ma’ Yousef Essesi, raġel li kienet ilha tafu minn meta kienu żgħar.
Kienet qalet li kien ilhom iżjed minn sena u nofs flimkien u li xtaqu jiżżewġu, iżda mhux Essesi ma kienx qed jingħata permess biex joħroġ nofs siegħa mill-ħabs biex jiżżewġu l-Belt. F”Mejju li għadda l-Prim’Awla tal-Qorti Ċivili fil-ġurisdizzjoni Kostituzzjonali tagħha, kienet tat lil Essesi €1,000 u lill-għarusa tiegħu €500 f’kumpens għal danni morali, u ddikjarat li d-dritt tagħhom għall-ħajja privata u tal-familja kien inkiser.
Fid-deċiżjoni tagħhom li tiċħad it-talba għal kumpens ogħla, il-Qorti Kostituzzjonali, ippreseduta mill-Prim Imħallef Mark Chetcuti, flimkien mal-imħallfin Giannino Caruana Demajo u Anthony Ellul, għamluha ċara li l-evalwazzjoni tal-provi f’dan il-każ kienet diġà saret minn il-qorti tal-ewwel istanza u li ma kienx hemm il-ħtieġa li tiġi ripetuta peress li l-appell ippreżentat ma kkontestax dan il-fatt.
Il-Qorti qalet li qieset diversi fatturi biex waslet għall-konklużjoni tagħha, l-ewwel waħda kienet li l-koppja kienu ppreżentaw nota fi Frar, fejn infurmawha li ma kinux għadhom f’relazzjoni flimkien. Innota wkoll li r-reġistrazzjonijiet tal-ħabs tat-telefonati bejniethom waqt li Essesi kien il-ħabs, urew li r-relazzjoni tal-koppja kienet diġà “mhux tajba” lejn l-aħħar tal-2019, meta ġiet ippreżentata t-talba oriġinali tagħhom għad-drittijiet tal-bniedem.
L-Imħallfin osservaw li l-fajl tal-ħabs ta’ Essesi wera li kien ilu s-snin joħloq inkwiet fil-Faċilità Korrettiva ta’ Kordin u kien is-suġġett ta’ bosta proċeduri dixxiplinarji hemmhekk. Rapport separat tal-imġieba wera wkoll li kien jaqla’ l-inkwiet, li r-rapporti regolari tiegħu ta ‘mġieba ħażina komplew fis-sena 2020.
Rapport ieħor maħruġ f’Marzu 2021 mit-Tim Multidixxiplinarju milll-Unit tal-Kura u r-Riintegrazzjoni kien iddeskriva Essesi bħala “personalità ta’ riskju għoli ħafna,” innotat il-qorti. “L-attitudni tiegħu hija tant ribelluża li tilef ukoll ammont mhux ikkonsiderevoli ta’ maħfriet mis-sentenzi li qed jiskonta.
Fil-fatt, huwa wkoll ikkawża inkwiet f’Diviżjoni 8…suppost l-aktar diviżjoni kalma fil-faċilità,” qalu l-Imħallfin, filwaqt li nnutaw, madankollu, li f’Mejju 2021 id-direttur tal-ħabs kien xehed għal titjib riċenti fl-imġieba ta’ Essesi. Il-Qorti Kostituzzjonali qalet li kienet tal-opinjoni li m’għandhiex tfixkel id-diskrezzjoni eżerċitata mill-Qorti preċedenti fir-rigward tal-kumpens. “Fir-rikors tal-appell ma ntqal xejn li jista’ jikkonvinċi lil din il-Qorti mod ieħor. Il-Qorti tifhem li r-rimedju kumpensatorju mogħti mill-ewwel qorti kien biżżejjed.”
