Franza hu r-raba’ u l-aħħar tim li assigura post fis-semi-finali tal-Kampjonati Ewropej tal-futbol tan-nisa, meta s-Sibt filgħaxija rebaħ 1-0 kontra l-Olanda f’Rotterham. Il-gowl deċiżiv kien skorjat fil-ħin barrani, wara li 90 minuta ma kienux biżżejjed sabiex ikun deċiż ir-rebbieħ bejn it-tnejn fl-aħħar logħba mill-kwarti tal-finali.
Eventwalment kellu jkun penalty, li kien mogħti fil-102 minuta tal-partita, u li kien skorjat mid-difensur Eve Perisset li għamel id-differenza kollha, biex Franza avvanzat għas-semi-finali ta’ din il-kompetizzjoni. Nhar l-Erbgħa li ġej, Franza tilgħab kontra l-Ġermanja, filwaqt li ġurnata qabel, nhar it-Tlieta li ġej, fl-ewwel semi-finali, l-Ingilterra tilgħab kontra l-Iżvezja.
