Ilbieraħ filgħaxija Dance Festival Malta organizzat minn Festivals Malta, fetaħ il-bibien tiegħu għall-ewwel darba għal professjonisti taż-żfin u dilettanti taż-żfin bl-ewwel edizzjoni tiegħu.
Waqt l-attività tal-ftuħ it-tim ippreżenta prestazzjoni minn Stopgap Dance Company bl-isem ‘Frock’. Frock hija produzzjoni ta’ żfin minn nies b’abiltajiet differenti, fejn sitt żeffiena jinterpretaw korjografija ta’ żfin, akkumpanjati minn kompożizzjonijiet oriġinali ta’ Hannah Miller u Oli Austin minn Moulettes. F’din il-korjografija mhux tas-soltu, osservazzjonijiet tal-logħob tal-imgħoddi jisplodu f’ċelebrazzjoni ‘punk’ ta’ individwalità u differenza.
Dawk li ħadu sehem f’sessjoni ta’ Q&R li saret fl-aħħar u ffaċilitata minn Dr Kathrina Farrugia-Kriel, il-Kap tar-Riċerka fir-Royal Academy of Dance, esklamaw kemm din il-produzzjoni kienet rinfreskanti. Ikkummentaw ukoll dwar kif l-inklussività ta’ żeffiena b’abbiltajiet differenti fl-industrija taż-żfin f’Malta għadha lura, u ferħu lil Festivals Malta talli għamlet l-ewwel pass biex dan jinbidel billi fetaħ l-ewwel festival taż-żfin f’Malta b’wirja ta’ żfin minn żeffiena
b’abbiltajiet differenti.
Is-serata kompliet b’wirjiet minn artisti lokali li ppreżentaw proġetti b’differenza, f’dawn il-proġetti taż-żfin spikka l-element ta’ letteratura li ġiet inkorporata fil-korjografiji ppreżentati u tat bażi, kuntest u spunti differenti lil dawn il-prestazzjonijiet. L-awditorju mimli tal-Valletta Campus Theatre fil-Belt Valletta kien immeraviljat bil-produzzjonijiet ta’ livell għoli ppreżentati minn Ruben Zahra u l-prestazzjoni teatrali taż-żfin tiegħu ‘Who is She?’, ‘(arti)kollazzjonijiet’ ta’ Johane Casabene, ‘Unchartered Origami’ ta’ Julienne Schembri u Benji Cachia, u ‘I am Alex’ ta’ Moveo Dance Company. Minbarra l-letteratura, dawn il-biċċiet missew suġġetti bħal, l-istorja, il-mitoloġija, il-proċess tal-bidla, u l-egocentriżmu fost oħrajn.
Il-festival se jibqa’ għaddej b’workshops ta’ kuljum u wirjiet ta’ filgħaxija sal-aħħar ta’ Lulju. Għad fadal xi biljetti disponibbli għas-serati tas-Sibt u l-Ħadd għal min hu interessat. Biljetti u aktar informazzjoni jistgħu jinkisbu minn www.festivals.mt/dfm.
