Il-kontinġent Malti taċ-Ċess kompost miż-żewġ timijiet nazzjonali jinsab f’Chennai, l-Indja sabiex jieħu sehem fl-44 edizzjoni tal-Olimpijadi taċ-Ċess. Wara ċ-ċerimonja tal-ftuħ li saret nhar il-Ħamis 28 ta’ Lulju, bil-logħob jibda l-għada l-Ġimgħa u jintemm fl-10 ta’ Awwissu. Malta hija fost il-185 pajjiż li ser jieħdu sehem. Dan huwa numru rekord ta’ pajjiżi li qed jipparteċipaw mill-aħħar Olimpjadi li saru f’Batumi, Georgia fl-2018.
It-tim tal-irġiel taħt it-tmexxija ta’ Robert Novak, huwa iffurmat minn Candidate Master (CM) Colin Pace, CM Jake Darmanin, CM Duncan Vella, CM David Cilia Vincenti u Jack Mizzi. Għal Jack dan huwa l-ewwel Olimpjadi tiegħu. It-tim tan-nisa huwa magħmul minn Woman Fide Master (WFM) Filipina Thornton, WFM Jamie Farrugia, Woman Candidate Master (WCM) Uranchimeg Psaila, Milena Stagno u Hayley Thornton. Għal Hayley fl-eta’ ta’ ħdax il-sena, dan huwa l-ewwel debutt tagħha fl-Olimpijadi.
Fide Master (FM) Geoffrey D. Borg, il-president tal-Federazzjoni Maltija taċ-Ċess (MCF) u Adrian Mizzi huma d-delegati responsabbli mill-kontinġent Malti. Malta hija wkoll rappreżentata minn Noel Grima li qiegħed jagħti sehmu fuq livell internazzjonali f’dawn l-Olimpijadi bħala arbiter.
