Raġel bla xogħol ta’ 49 sena mir-Rabat ġie mmultat u ngħata sentenza sospiża ta’ 21 xahar wara li ammetta li ta fastidju u hedded lil ħuh kif ukoll lin-neputija. Ir-raġel tressaq il-Qorti akkużat li sfurza u hedded lill-vittmi permezz ta’ ‘messenger app’ u li attakkahom.
Il-Maġistrat Doreen Clarke kienet infurmata kif l-imputat kien involut f’tilwima fil-qorti tal-familja, li kienet waslet fil-qofol meta xehed favur l-eks raġel tal-vittma. L-inċidenti li ttrattati l-akkużi bdew jinqalgħu wara x-xhieda, qal l-avukat difensur Daniel Attard, li informa wkoll lill-Qorti li l-klijent tiegħu se jkun qed iwieġeb ħati.
L-akkużat ikkonferma l-ħtija tiegħu meta mistoqsi direttament mill-qorti. Fis-sottomissjonijiet tiegħu dwar il-piena, l-Ispettur Eman Hayman qal li r-raġel kien għażel il-metodu ħażin biex jikkonfronta lill-parte civile, “kemm fiżikament kif ukoll b’komunikazzjonijiet elettroniċi kostanti one-way.”
Kwalunkwe piena imposta mill-qorti trid isservi biex l-akkużat jingħata lezzjoni, żied jgħid l-ispettur. Għad-difiża, Attard sostna li l-klijent tiegħu kien maħkum mill-biża’ minn ħuh, li sostna, dejjem iġorr sikkina fuq il-persuna tiegħu. Il-Qorti sabet lir-raġel ħati fuq l-ammissjoni tiegħu stess, u imponiet multa ta’ €100 u sentenza ta’ 21 xahar ħabs, li ġiet sospiża għal tliet snin.
Ġiet imposta wkoll ordni ta’ trażżin, li tipprojbixxih milli jipprova jagħmel xi forma ta’ kuntatt mal-vittmi għal tliet snin. Il-qorti laqgħet talba biex tiġi pprojbita l-pubblikazzjoni tal-ismijiet tal-partijiet, fid-dawl tal-fatt li r-raġel huwa xhud tad-difiża fi proċess ta’ stupru li għandu jibda fil-futur qarib, li jinvolvi lill-familja.
