Imħallef se jibda jisma’ l-kawża mressqa mill-NGO Repubblika fuq is-Saltna tad-Dritt, dwar it-tkaxkir tas-saqajn li jiġu akkużati diversi individwi ta’ grad għoli li l-prosekuzzjoni tagħhom kienet ġiet rakkomandata fil-konklużjonijiet tal-inkjesta maġisterjali dwar il-Bank Pilatus. Kollox jindika li l-każ se jibda jinstema’ f’Settembru li ġej.
F’ittra ġudizzjarja li ġiet preżentata x-xahar li għadda, l-avukat ta’ Repubblika Jason Azzopardi kien qal li r-rifjut konsistenti tal-Avukat Ġenerali Victoria Buttigieg li tressaq akkużi ma kienx wieħed raġonevoli u wera mala fede min-naħa tal-prosekutur pubbliku.
“Id-deċiżjoni tal-konvenut, fil-fatt, li ma jakkużax jew ma jipproċedix kif kienu ġew ordnati mill-Maġistrat inkwirenti f’Marzu 2021 hija eżattament l-oppost għal deċiżjoni ‘raġonevoli’,” tgħid l-ittra ġudizzjarja. Il-każ ġie assenjat lill-Imħallef Christian Falzon Scerri li, f’digriet li ta, iffissa perjodu ta’ 20 jum li fih l-Uffiċċju tal-Avukat Ġenerali jista’ jippreżenta t-tweġiba tiegħu.
L-imħallef ordna wkoll lill-AĠ biex tesebixxi permezz ta’ nota “kull dokument rilevanti li għad irid jiddaħħal fl-atti tal-kawża, flimkien ma’ kull ċertifikat jew rapport ta’ esperti.” L-Avukat Jason Azzopardi qed jirrappreżenta lill-NGO fil-proċeduri.
