L-avukati ta’ Fredrick Azzopardi qed jitolbu għar-rekuża tal-Maġistrat Elaine Mercieca, u qed jargumentaw li l-każ huwa solvut għaliex multa marbuta miegħu kienet tħallset.
Huma qed jgħidu wkoll li l-każ hu preskritt għax għaddew aktar minn tlett xhur minn meta seħħ.
It-Tlieta filgħodu l-eks Kap Eżekuttiv ta’ Infrastructure Malta tressaq il-Qorti akkużat li fl-2019 ordna li jitkomplew xogħolijiet f’Wied Qirda f’Ħaż-Żebbuġ minkejja li l-Awtorità tal-Ambjent u r-Riżorsi ddikkjarat li x-xogħol kien qed jikser liġijiet għall-ħarsien tal-ambjent u waqqfet lill-kuntrattur milli jkompli għaddej.
F’awla 22 quddiem il-Maġistrat Elaine Mercieca, l-avukati ta’ Azzopardi argumentaw li l-każ kontra l-eks CEO hu bla bażi għax multa amministrattiva marbuta miegħu kienet tħallset, u għax huwa preskritt, jiġifieri minn meta seħħ il-każ sal-lum laħaq għadda ż-żmien mogħti il-liġi biex titieħħed azzjoni legali.
Huma talbu wkoll li l-maġistrat tirrekuża ruħha għaliex kienet l-istess Mercieca li semgħet il-każ kontra l-kuntrattur li għamel ix-xogħol f’Wied Qirda.
Il-Maġistrat waqqfet is-smigħ wara t-talbiet tad-difiża u l-kawża ġiet differita għas-27 ta’ Settembru fid-9.00am.
Anthony Camilleri, il-kuntrattur imqabbad minn Infrastructure Malta biex jagħmel ix-xogħolijiet, instab ħati li kiser ordni tal-Awtorità tal-Ambjet.
Waqt is-smigħ tal-każ kontrih hu xehed li kien propju Fredrick Azzopardi li ordnalu jinjora dak li kienet qalet l-ERA u jkompli biex xogħol.
L-ERA waqqfet ix-xogħol li kien qed isir f’Wied Qirda, Ħaż-Zebbuġ għax kien qed isir sfreġju fuq pjanti u siġar protetti bil-liġi, meta nqalgħu minn posthom u meta z-zona hi magħrufa bħala waħda sensttiva u ta’ valur ekoloġiku.
Infrastructure Malta kienet qed tagħmel xogħol fuq triq li twassal għal residenza privata.
