L-awtur Salman Rushdie – li kiseb fama internazzjonali għall-ktieb kontroversjali ‘The Satanic Verses’ – tneħħa minn fuq ventilatur, bis-sitwazzjoni tiegħu tkun imfissra bħala stabbli, jumejn wara li hu kien spiċċa midrub minn aggressur fl-Istat ta’ New York (Stati Uniti).
L-attakk – fejn l-awtur ġarrab daqqiet ta’ sikkina f’għonqu, f’wiċċu u f’żaqqu — seħħ meta hu kien qed jipprepara taħdita fiċ-Chautauqua Institution (għall-arti u l-edukazzjoni), fl-Istat ta’ New York.
Intant, Rushdie – li kien spiċċa f’sitwazzjoni kritika għal sigħat wara l-attakk – issa jista’ jitkellem mill-ġdid u bir-rapporti jgħidu li l-awtur ta’ 75 sena anki ‘qed jipprova jiċċajta dwar dak li kellu jgħaddi minnu’.
Il-ktieb The Satanic Verses, li ħareġ fl-1988, kien qanqal reazzjoni furjuża fost il-komunitajiet tal-Iżlamiċi madwar id-dinja, b’għexieren ta’ eluf ta’ Musulmani jsostnu li ‘il-karatterizzazzjoni (fil-ktieb) tal-Profeta Muhammad, il-fundatur tal-Islam, kienet insult kbir lill-fidi tagħhom’.
Dan waqt li l-eks Ayatollah tal-Iran, Ruhollah Khomeini, kien iddikjara sentenza tal-mewt għal Rushdie dwar ‘iż-żebligħ tal-Islam’ u bir-riżultat li l-awtur kellu jgħix għal għaxar snin taħt periklu kontinwu.
Fl-aħħar sigħat ukoll, l-aggressur. Hadi Matar, li tressqulu l-akkużi dwar l-attakk tal-Ġimgħa fuq Rushdie, wieġeb li mhux ħati dwar attentat ta’ qtil u bħalissa qed jinżamm taħt arrest – mingħajr l-ebda possibbiltà ta’ libertà proviżorja.
Jidher, intant, li Rushdie jinsab f’periklu li jitlef il-vista minn għajn waħda u meta fl-istess attakk tal-Ġimgħa spiċċa jweġġa’ ħafif Henry Reese li kien qed jipprepara biex jintervista lil dan l-awtur. Reese hu l-ko-fundatur ta’ organizzazzjoni li tipprovdi l-kenn lill-awturi eżiljati minn arthom u li qed ikunu suġġetti għall-persekuzzjoni mill-awtoritajiet ta’ diversi Stati.
Fil-fatt – u qabel spiċċa attakkat fuq il-palk – Salman Rushdie kien qed jipprepara għal diskors dwar kif l-Istati Uniti ilha s-snin tipprovdi refuġju għall-awturi u kittieba li bħalu spiċċaw vittmi tal-intolleranza u ‘mibgħeda għamja mingħajr raġuni valida’.
//= $special ?>