Fil-Qorti deher raġel ieħor b’rabta mal-ġlieda li seħħet fi Triq il-Kbira San Ġużepp, il-Ħamrun nhar il-Ħamis li għadda.
Hu deher quddiem il-Maġistrat Lara Lanfranco, assistit minn interpretu.
Ilbieraħ, b’rabta mal-istess ġlieda, tressaq Abdullah Sheikh Ahmad, Sirjan ta’ 30 sena. Hu wieġeb mhux ħati tal-akkużi miġjuba kontrih.
Ahmad inżamm arrestat.
Fl-argument tal-Ħamis kienu involuti bejn 20 u 30 raġel u persuna indarbet waqt il-ġlieda.
13:58 L-avukat Xuereb qal li l-akkużat se jippreżenta filmati fejn l-allegat vittma jidher qed jisraq lill-akkużat. Hu qed jargumenta favur il-libertà proviżorja. Il-Qorti qalet li sakemm jinstemgħu ix-xhieda, l-akkużat għandu jibqa’ taħt arrest u caħdet din it-talba.
13:35 Id-difiża qed jiċċara li ma hemm l-ebda rabta mal-ewwel raġel li tressaq ilbieraħ b’rabta mal-istess ġlieda. L-avukat Xuereb qal li l-involviment tal-akkużat tal-lum jidher fil-fimati tas-CCTV imma ma jidher ċar xejn x’għandu f’idejh. Xuereb qal li l-akkużat qed irabbi tlett itfal waħdu.
13:34 L-avukat tal-prosekuzzjoni qed jgħid li l-akkużi fil-konfront ta’ Ahmad huma serji ferm għaliex l-azzjonijiet tiegħu wasslu biex persuna sofra ġrieħi gravi ferm.
13:31 Il-prosekuzzjoni tgħid li hemm ħafna xhieda anke pajżana dwar dan il-ġlieda.
13:29 L-akkużat hu Abdul Ahmad ta’ 35 sena imwieled is-Sirja u joqgħod il-Marsa. Ahmad jaħdem fil-bini. L-akkużat wieġeb mhux ħati tal-akkużi.
13:27 Il-Qorti sabt li d-drittijiet tal-imputat ma ġewx miksura u l-arrest tiegħu hu wieħed validu f’għajnejn il-liġi.
13:26 Il-prosekuzzjoni tgħid li waqt l-arrest, l-imputat indika li kien qed jidher li qed jifhem dak li kien qed jiġri u kkopera mal-Pulizija.
13:24 Il-Qorti vverbalizzat din it-talba, fejn id-difiża qed tqajjem dubju dwar jekk l-akkużat kienx infurmat ta’ dak li kien qed jiġri waqt l-arrest fiżiku tiegħu.
13:21 Id-difiża qed tibqa’ tistaqsi jekk l-akkużat fil-punt tal-arrest tiegħu kienx konxju ta’ dak li kien qed jiġri. L-avukat Matthew Xuereb li qed jidher għall-akkużat qed jghid li kien impossibbli li l-klijent tiegħi jiġi infurmat dwar x’kien qed jiġri minħabba n-nuqqas ta’ manpower fl-għassa. Madankollu l-Qorti qed tgħid li l-akkużat ma kienx arrestat waqt il-kommossjoni li nqalgħet imma f’daru aktar tard.
13:19 Ġie maqbul li r-reat li dwaru huwa akkużat Abdul Ahmad iġorr piena ta’ massimu ta’ tliet snin ħabs.
13:13 Il-Qorti qed tistaqsi lill-Ispettur Spiteri jekk id-drittijiet tiegħu ingħatawx lill-akkużat permezz ta’ interpretu. ll-prosekuzzjoni tispjega li waqt l-arrest ma kienx hemm interpretu imma fl-għassa kellu aċċess għall-interpretu biex jassisti lil Ahmad.
13:10 Id-difiża qed targumenta li meta l-akkużat ġie arrestat ma kienx jaf x’qed jiġri għax ma kellux interpretu u l-mandat kien bil-Malti u bl-Ingliż u allura ma setax jifhmu.
13:08 Id-difiża filwaqt li rringrizzjat lill-Pulizija tax-xogħol li wettqet fl-aħħar jiem fil-Ħamrun, qal li kif jidhru filmati ta’ dak li seħħ dakinhar tal-ġlieda, l-allegat vittma jidher qed jagħmel mossi fid-direzzjoni tal-istess akkużat.
L-arrest tal-akkużat sar f’daru stess.
13:07 Il-prosekuzzjoni qed tgħid li kemm il-vittma kif ukoll xhieda oħra li kienu fil-post waqt il-ġlieda identifikaw lill-akkużat bħala l-persuna li aggredixxa lill-vittma b’xafra u kkawżalu ġrieħi f’saqajh.
13:06 Il-prosekuzzjoni qed tispjega li nhar il-Ħamis faqqgħet ġlieda bejn żewġ familji barranin fuq xi flus. Dan wara li l-familji ppruvaw jirranaġaw is-sitwazzjoni bejniethom, għalkemm xhieda oħra qalu li ma kienx sar tentattiv biex jitranġaw l-affarijiet.
13:05 Id-difiża tal-akkużat, qed jitlob informazzjoni dwar kif ġie identifikat l-akkużat bħala partiċipi fil-ġlieda.
