Student ta’ 21 sena minn Ħal Tarxien ċaħad li stupra żewġ tfajliet, waħda minnhom minorenni, f’inċidenti separati f’perjodu ta’ 24 siegħa. L-ispetturi John Spiteri, Sarah Kathleen Zerafa, Ryan Vella u l-Prosekutur Darlene Grima mill-uffiċċju tal-AĠ akkużaw liż-żagħżugħ, li ma jistax jissemma fuq ordni tal-Qorti, b’żewġ akkużi ta’ stupru u arrest illegali.
Huwa wieġeb mhux ħati. Fil-Qorti ntqal li l-ewwel mill-allegati inċidenti seħħ qrib nofs il-lejl tat-3 ta’ Ġunju, f’Ħal Tarxien u l-ieħor f’ħin simili fl-4 ta’ Ġunju f’Little Armier. L-avukat difensur Arthur Azzopardi, talab il-ħelsien mill-arrest u talab għall-projbizzjoni tal-pubblikazzjoni tal-isem tal-akkużat u taż-żewġ vittmi tiegħu.
Il-prosekuzzjoni oġġezzjonat għall-ħelsien mill-arrest, Grima irrimarka li l-vittmi kienu għadhom iridu jixhdu f’dan il-każ, u li kien hemm diversi xhieda ċivili importanti. L-ispettur John Spiteri żied jgħid li l-allegata vittma tal-ewwel aggressjoni kienet tant kienet fis-sakra li ma setgħetx tiddeskrivi lill-aggressur tagħha.
Barra minn hekk, diversi persuni, li kienet magħhom u li kienu tawha lift fil-post, jgħixu qrib l-akkużat, qal l-ispettur. “Il-ftit li tiftakar huwa importanti ħafna wkoll. Sadaniitant id-DNA jorbot lill-akkużat mad-delitt inizjali, iżda x-xhieda hija kruċjali.”
Għad-difiża, Azzopardi sostna li ma kienx hemm dubju li dawn ix-xhieda jridu jixhdu. L-akkużat u l-vittma ma kellhom ebda konnessjoni jew komunikazzjoni bejniethom, huwa qal. Ix-xhieda ċivili li fadal huma sidien ta’ CCTV, liema filmati ma jistgħux jiġu mbagħbsa, u nies li se jixhdu li l-vittma kienet fis-sakra.
Imbagħad ġie rrimarkat lill-avukat li t-tieni każ kien jinvolvi minorenni. Hija xehdet fl-inkjesta u ma tistax tbiddel il-verżjoni tagħha. Il-bqija huma nies li kienu ġew mitkellma mill-pulizija u huma kollha xhieda tad-difiża, qal l-avukat. “Għalhekk għandna żagħżugħ ta’ 21 sena, li tressaq l-ewwel darba b’rekord kriminali nadif. Għadu student, jgħix mal-ġenituri tiegħu, li huma lesti li jiggarantixxu l-libertà proviżorja tiegħu,” sostna l-avukat, filwaqt li aċċetta li l-akkużi “mhumiex pjaċevoli.”
Spiteri qabel parzjalment mad-difiża, iżda qal li minkejja li l-akkużat kien għadu student, xorta baqgħet il-biża’ li tbagħbis l-evidenza. “Għalkemm isostni li ma kienx jaf wieħed mill-ismijiet tal-vittma, issa jagħmel dan għax jissemma fl-akkużi.” Żewġ xhieda fil-club fejn il-vittma kienet qed tixrob, huma importanti biex jiġi stabbilit il-ħin li fih sar ix-xorb, qabel ma ngħatat lift mill-akkużat.”
Żied jgħid li bl-ebda mod il-pubblikazzjoni tal-isem tal-akkużat ma twassal għall-identifikazzjoni tal-vittmi. Il-kontroreplika ta’ Azzopardi rrimarkat is-CCTV li ppreserva l-ħinijiet, u sostna li ż-żewġ xhieda ma kinux kruċjali daqs kemm kienet qed tinsisti l-prosekuzzjoni. Il-persuni kollha preżenti fil-party jitgħu jafu x’ġara.
Hekk kif l-akkużat jissemma fl-istampa, kull min kien hemm ikun jaf min huma l-vittmi. “Dawn l-akkużi ma kellhomx issiru fil-pubbliku, iżda bil-bibien magħluqa. Huwa żball tal-prosekuzzjoni, għax il-kodiċi Kriminali jistipula li l-proċeduri kollha għandhom isiru bil-bibien magħluqa.” Il-qorti, wara li semgħet is-sottomissjonijiet tal-partijiet, ċaħdet il-libertà proviżorja u laqgħet it-talba għal projbizzjoni fuq il-pubblikazzjoni tal-isem tal-akkużat jew tal-allegati vittmi.
