Rowen Camilleri
ĦAMRUN SPARTANS………3
FK PARTIZAN………………….3
Ħamrun S.: H. Bonello, M. Sowe, O. Bjelicic, E. Marcelina, R. Callegari, R. Camenzuli (V. Freitas79’), M. Guillaumier (M. Fedele 79’), R. Prsa, Dodo (B. Ederson 73’), E. Mashike (I. Nedjelkovic 73’), L. Montebello (Jonny 63’)
FK Partizan: A. Popovic, S. Urosevic (Z. Sehovic 80’), I.Vujacic, S. Sanicanin, S. Markovic, F. Diabate (B. Natcho 75’), L. Fejsa, M. Zivkovic, P. Andrade, R. Gomes, Q. Menig (K. Belic 70’)
Imwissija: M. Sowe 30’, I. Nedjelkovic 75’, R. Callegari 80’ (Ħ), M. Zivkovic 35’ (P)
Skorjaw: R. Prsa 27, V. Freitas 82’pen, M. Fedele 90+1’ (Ħ), R. Gomes 34’,79, S. Urosevic 72’ (P)
Referee: Jacob Kehlet (Danimarka)
Assistenti Referees: Lars Hummelgaard u Victor Skytee (Danimarka)
Wirja mill-aqwa speċjalment fl-ewwel 45 minuta kontra tim kwotat ferm aktar mill-Ispartans ma’ kinux biżżejjed biex it-tim immexxi minn Branko Nisevic ikompli javvanza fil-UEFA Conference League hekk kif fl-istadium Nazzjonali Ta’ Qali spiċċaw fi dro ta’ 3-3 kontra s-Serbi ta’ FK Partizan. Bir-riżultat ta’ 4-1 fl-ewwel leg is-Serbi għaddew b’aggregate ta’ 7-4.
Kienu Ħamrun li marru fil-vantaġġ wara 27 minuta permezz ta’ Prsa ftit qabel in-nofs siegħa logħob iżda goal kontra x-xejra tal-logħob fl-34 minuta għal Partizan temm l-ewwel taqsima fi dro ta’ 1-1. Partizan kienu aħjar fit tieni taqsima u skorjaw darbtejn oħra biex imbagħad Ħamrun naqsu d-distakk lejn l-aħħar għaxar minuti minn penalty tas-sostitut Freitas u penalty ieħor ta’ Fedele fil-91 minuta ġab l-iskor indaqs.
Kif kien mistenni Ħamrun ħarġu jfittxu l-gowl kmieni u wara biss żewġ minuti Matthew Guillaumier approfitta minn żball difensiv ta’ Partizan u wara li avvanza spara xutt lejn il-lasta, bil-goalkeeper Popovic ikollu jdawwar f’korner. Fl-10 minuta Elvis niżżel tajjeb lejn Prsa bil-Kroat l-ewwel jaqbeż lid-difensur ta’ Partizan Fejsa u minn qagħda ċentrali prova l-konklużjoni li għaddiet ftit barra. Ħamrun baqgħu aħjar mill-avversarji u fit-22 minuta Dodo ttanta xortih minn barra l-kaxxa iżda Popovic kien attent u laqa’ tajjeb. Ħames minuti wara Ħamrun meritatament imorru fil-vantaġġ. Kien Matthew Guillaumier li b’pass inteliġenti żmarka tajjeb lil ROKO PRSA li minn quddiem Popovic b’eleganza tefa’ fix-xibka. Kontra x-xejra tal-logħob Partizan ġabu l-gowl tad-dro fl-34 minuta meta Bonello tajjar parzjalment il-kross ta’ Zivkovic iżda l-ballun waqa’ fuq saqajn RICARDO GOMES li b’xutt mill-isbaħ għeleb għal kollox lil Bonello. Dan il-gowl ma’ tellifx mill-konċentrazzjoni ta’ Ħamrun u żewġ minuti wara minn tarf il-kaxxa reġa’ kien Guillaumier li ra x-xutt mill-isbaħ tiegħu jgħaddi jħakkek mal-wieqfa.
Fit-tieni taqsima l-andament beda aktar bil-mod u fit-52 minuta Elvis avvanza mal-linja u tefa’ pass insidjuż fil-kaxxa iżda sfortunatament għal Ħamrun ma sab lil ħadd f’dak li kien ikun ċans tad-deheb. Fid-59 minuta Menig jirċievi ballun fil-kaxxa iżda l-konklużjoni tal-Olandiż tgħaddi barra. Fl-64 minuta Dodo seraq ballun minn nofs il-ground u avvanza bih sa tarf il-kaxxa fejn prova xutt b’saħħtu iżda l-ballun mar għoli. Partizan mewtu kull tama Ħamruniża fit-72 minuta meta l-captain tat-tim SLOBODAN UROSEVIC daħal fil-kaxxa u b’xutt fil-baxx għeleb lil Bonello. Fid-79 minuta Partizan skorjaw it-tielet gowl meta kien kross preċiż ta’ Andrade li sab lil RICARDO GOMES li minn taħt Bonello bir-ras tefa’ ġewwa. Fit-82 minuta Ħamrun naqqsu d-distakk minn penalty tas-sostitut VICINIUS FREITAS wara handsball fil-kaxxa ta’ Vujacic. Mad-disgħin minuta logħob Ederson Bruno twaqqa fil-kaxxa u Ħamrun ingħataw penalty ieħor. Din id-darba inkariga minnu MATTEO FEDELE li ma’ żbaljax u ġab il-gowl tad-dro. L-iskor baqa dak ta’ 3-3 u għalkemm Ħamrun sfaw eliminati mill-kompetizzjoni Ewropea xorta waħda ħarġu b’rashom mgħollija kemm għall-prestazzjoni f’din il-logħba kif ukoll tul l-avventura tagħhom fl-Europa Conference League.
