Ryan Schembri li ħarab lejn ir-Renju Unit wara li kien qed jiġi mfittex mill-Pulizija fuq każijiet ta’ frodi wara l-falliment tal-imperu li kien bena fil-katina ta’ Supermarkets More kien jgħid lill-investituri fil-kumpanijiet tiegħu li kuġinuh Keith Schembri jaħdem Kastilja u għandu ħafna poter.
Dan ħareġ miinn xhieda ta’ anzjan irtirat li għandu 68 sena, li qal fil-Qorti kif kien spiċċa fi stat ta’ “ġenn” wara li l-eks sid ta’ More Supermarkets Ryan Schembri sparixxa b’aktar minn €140,000 li kien investa fin-negozju tiegħu. Dan ħareġ hekk kif it-Tlieta komplew il-proċeduri kriminali kontra Schembri ta’ 43 sena mill-Mellieħa, li jinsab akkużat b’ħasil ta’ flus, misapproprjazzjoni, frodi, li għamel qligħ frawdolenti, li offra servizzi ta’ investiment finanzjarju mingħajr liċenzja u li xjentement għamel użu minn dokumenti foloz.
Il-kaħħal irtirat Thomas Gravina kien wieħed minn diversi xhieda li ħadu xehdu fil-kumpilazzjoni kontra Schembri quddiem il-Maġistrat Donatella Frendo Dimech. Gravina spjega li qabel kien investa ma’ ditta ta’ ppjanar finanzjarju iżda l-ħabib tiegħu Joe Difesa kien ikkonvinċih biex jinvesti fil-kumpaniji ta’ Ryan Schembri.”
“Investejt €20,000 u mbagħad €123,000 oħra bejn l-2014 u l-2015. “Erbgħa xhur wara Schembri sparixxa bil-flus. Ġennni..” Ix-xhud spjega li hu kien għadda dawn is-somom kbar ta’ flus lil Schembri personalment, fi flus kontanti u kien irċieva biss ħlasijiet ta’ imgħax fuq is-somma investita, mingħajr ma rkupra qatt is-somma li kien investa.
Gravina qal lill-Qorti li kien se jirċievi pagamenti ta’ imgħax f’forma ta’ ċekkijiet, li qatt ma kien se jiddepożita f’kont. “Kont nirritorna lura ċ-ċekkijiet lilu meta kienu se jiskadu u kien iħallasli l-imgħax fi flus kontanti. Jien qatt ma mort il-bank.”
“Sieħbi Joe Difesa kien daħħalni miegħu. Kien investa ma’ Schembri qabli u ħeġġiġni nagħmel l-istess.” Ippressat fuq dak li kkonvinċieh biex joħroġ il-flus kontanti tiegħu, ix-xhud qal li ma kienx kapaċi jiftakar dak li ntqal lilu biex iħeġġu jinvesti.
Ryan Schembri jagħmel l-arja b’kuġinuh
Mistoqsi għaliex kien investa l-flus kontanti, ix-xhud sempliċement wieġeb “biex naqla’ xi flus żejda, taf kif?” Gravina qal lill-Qorti li Difesa kienet ikkwota lil Schembri li kien sostna li “kuġinuh, Keith Schembri, kien jaħdem f’Kastilja u li kellu ħafna poter.”
Ix-xhud ma kienx komdu jispjega kif kienet taħdem is-sistema adottata ma’ Schembri. B’diffikultà konsiderevoli, eventwalment ħareġ li kien se jgħaddi flus kontanti lil Schembri bi tpattija għal ċekk ‘post-dated’ (jissarraf wara), li kien jerġa’ jgħaddih lura xahar wara, bi skambju għal somma flus li tirrappreżenta l-interess tiegħu.
Mistoqsi mill-avukat tal-prosekuzzjoni Francesco Refalo jekk qattx daħħal iċ-ċekkijiet, ir-raġel wieġeb li ma kienx. “Le, l-interessi biss,” qal Gravina. Mistoqsi kemm kien se jirċievi flus f’dawn il-ħlasijiet tal-imgħax, huwa wieġeb: “forsi €3,000, €4,000, fi tliet xhur.”
Ippressat fuq il-grad tal-involviment tal-imputat, ir-raġel wieġeb li “kull ma għamilt kien permezz ta’ ħabib tiegħi, ma tantx iltqajt ma’ Schembri.” Kontro-eżaminat mill-avukat difensur Roberto Montalto, ix-xhud qal li l-ewwel darba li investa xi flus, €25,000 f’dan il-każ, kien akkumpanja lil Difesa fil-fabbrika ta’ Schembri.
“Fiex kont se tinvesti?” staqsa Refalo. “Ma kontx naf lilu,” wieġeb ix-xhud. Meta tħares lejn id-dokument ippreżentat bħala prova, il-qorti nnutat li n-nota ta’ investiment, li kienet ġiet iffirmata biss mill-akkużat, semmiet ‘investiment: portioned beef.’ “X’inhu ‘investiment: portioned beef’?” staqsiet l-maġistrat.
“Ma nafx,” wieġeb ix-xhud. Montalto imbagħad ikkonfronta lix-xhud b’sitt ċekkijiet maħruġa minn Banif Bank. “Qatt iddepożitajthom fil-bank?” staqsa l-avukat. “Le, qatt ma ħadthom il-bank,” wieġeb Gravina. Xehed ukoll Dennis Francalanza, li kien ir-relation manager tal-Bank HSBC għal Schembri Marketing Ltd, u li minn dak iż-żmien ‘l hawn irtira.
Il-qorti hawn ħelset lix-xhud mill-privileġġ bankarju, u ppermettielu jixhed dwar il-każ. “Dak iż-żmien, l-iktar funzjoni importanti tal-irwol tiegħu (Francalanza) kienet li jieħu ħsieb is-self tal-kumpanija fuq il-klijenti. Overdrafts u loans,” huwa qal filwaqt li żied li se jittratta esklussivament maż-żewġ diretturi ta’ More Supermarkets Ltd, Ryan Schembri u Etienne Cassar, u l-awdituri tal-kumpanija.
“Dak iż-żmien bejn l-2004 sa 2011, il-kumpanija kienet fi stadju ta’ espansjoni, b’bejgħ u profitti li qed jiżdiedu. Kien hemm xi riżervi dwar iċ-ċifri li qed jiġu ppreżentati iżda ma kienx hemm fhiex wieħed jaħseb ħażin,” qal. Francalanza, li qal ukoll lill-Qorti li wara li ħalla l-impjieg tiegħu fil-bank, kien ħadem bħala konsulent mal-kumpanija ta’ Schembri, “fuq studji ta’ fattibilità tal-budgets, analiżi fuq ‘break even’, u spjega l-korrispondenza bankarja.”
“Ħdimt magħhom sal-2014 meta ingħaqad direttur ġdid, Darren Casha.” Qabel l-2012, Cassar & Schembri Ltd kienu ħatfu l-opportunità biex jespandu fin-negozju tas-supermarkets, u waqqfu dawk li eventwalment saru More Supermarkets.
“Kont parti minn grupp żgħir, magħruf bħala t-tim ta’ qabel il-ftuħ. Il-kompitu tiegħi kien li nikkollega mal-banek u niżgura li jkun hemm faċilitajiet ta’ self disponibbli.” Schembri u Cassar kienu ħatru wkoll lil Francalanza biex jagħmel studju ta’ fattibilità dwar More Supermarkets, huwa qal.
APS u Banif kienu qablu li jagħtu lil More Supermarkets Ltd ( tal-Ħamrun) li tissejjaħ faċilità bankarja ġenerali, essenzjalment overdraft kbir, żied ix-xhud. “Jien ippreżentajt il-kontijiet verifikati lill-banek, li kienu sodisfatti li l-kumpanija kienet se tiġġenera profitt suffiċjenti biex tħallas lura s-self.”
Il-Maġistrat Frendo Dimech talbet lix-xhud jispjega x’inhuma l-pjanijiet tan-negozju. “Hawn qed nitkellmu dwar negozju ġdid f’kumpless ġdid – rarità dak iż-żmien- fil-Ħamrun, catchment area tajba.” “Kien hemm ukoll l-istrateġija ta’ dan is-supermarket – b’mod differenti minn supermarkets oħra, riedu prezzijiet orħos biex jikkompetu ma’ supermarkets ikbar.
Kien hemm il-ħsieb li More Supermarkets jaddotta strateġija ġdida
Riedu jkunu l-leaders tal-prezzijiet, dak iż-żmien, kienet strateġija ġdida.” L-attrazzjonijiet prinċipali għas-Supermarket kellhom ikunu l-prezzijiet, il-faċilitajiet tal-parkeġġ fuq il-post u d-daqs. “Il-post kien kbir ħafna,” huwa irrimarka. Supermarkets oħra kienu eventwalment inxtraw mill-kumpanija, iżda dan li rtira fl-2014 huwa qal, waqt li qal lill-Qorti li Edmond Mugliette kien ħa f’idejh it-tmexxija fis-26 ta’ Ġunju 2014.
“Dak iż-żmien kien hemm bidla fl-ishma. u Darren Casha ngħaqad mal-kumpanija. Intlabt ngħin fit-tranżizzjoni u hekk għamilt, iżda fil-15 ta’ Novembru ta’ dik is-sena rmejt ix-xugaman” Mistoqsi dwar l-istruttura ta’ More Supermarkets Hamrun Ltd, Francalanza qal lill-Qorti li 30% tal-ishma kienu miżmuma minn Cassar u Schembri, bi 30% oħra miżmuma minn Imora Holdings.
Panelix Supplies kellha 26% oħra tal-ishma. “Ċertu Delia kellu 10% u K Consult Ltd 10% oħra.” Aktar xhieda mistennija jinstemgħu meta l-każ ikompli nhar il-Ġimgħa. Ryan Schembri tressaq il-Qorti f’April ta’ din is-sena bis-saħħa ta’ Mandat ta’ Arrest Ewropew wara li nstab li kien joqgħod fir-Renju Unit.
Bħala sid tal-katina falluta ta’ supermarket More, Schembri kien konness mad-dejn tas-supermarket li kien wassal għall-qtil tal-avukat Carmel Chircop fl-2015. Chircop kien sellef €750,000 lil More Supermarkets f’Marzu tal-2014. Fil-kuntratt dehru bħala debituri s-sieħeb fin-negozju ta’ Schembri Etienne Cassar, kif ukoll Adrian Agius, wieħed mill-irġiel arrestati għall-ewwel darba mill-pulizija f’Diċembru 2017 b’rabta mal-qtil ta’ Daphne Caruana Galizia.
Flimkien, Schembri u Cassar, u Agius, kellhom ishma f’kumpanija konġunta oħra msejħa Interaa Holdings. Agius, magħruf bħala ‘tal-Maksar’, qabel kien ukoll direttur marbut mas-supermarket More tal-Ħamrun. Agius kien direttur ta’ Interaa Holdings, bl-azzjonisti jikkonsistu minn Cassar & Schembri Marketing ta’ Schembri stess (40%), M&R Construction (15%) u Panelix Supplies (25%), u Imora Holdings ta’ Agius (20%). L-Avukat Francesco Refalo mill-Uffiċċju tal-Avukat Ġenerali qed jassisti l-prosekuzzjoni.
