Ir-Reġina Eliżabetta II tinsab taħt superviżjni medika f’Balmoral wara li tħassib mit-tobba dwar saħħet ir-reġina.
Dan tħabbar mill-Palazz ta’ Buckingham stess fejn ġie spjegat li wara li l-Ħamis filgħodu saru numru ta’ evalwazzjonijiet neċessarji, it-tobba indikaw li ikun għaqli li r-reġina tibqa’ taħt superviżjoni medika.
Filwaqt li l-Prinċep Charles vjaġġa minnufih lejn Balmoral, huwa mifhum li r-reġina tinsab f’qagħda komda u stabbli.
Huwa wkoll mistenni jagħmel il-wasla tiegħu f’Balmoral id-Duka ta’ York, Prinċepp Andrew flimkien mal-Konti u l-Kontessa ta’ Wessex, Edward u Sophie. Dan filwaqt li l-Prinċipessa Anne diġà tinsab fl-Iskozja.
Ġie mħabbar li d-Dukessa ta’ Cambridge u l-mara ta’ Prinċep William, Kate Middleton, baqgħet f’Windsor hekk kif proprju illum uliedhom kellhom l-ewwel ġurnata skola.
Rapporti mir-Renju Unit spjegaw li ulied ir-Reġina kollha kemm huma se jkunu qed jinġabru f’Balmoral…filwaqt li sar magħruf li Harry, iben il-Prinċep Charles, jinsab fi triqtu lejn l-Iskozja. Dan hekk kif bosta membri tal-Familja Rjali qed jagħmlu l-wasla tagħhom fil-Kastell sabiex ikunu magħha f’dawn il-mumenti.
Dan filwaqt li l-Prim Ministru Liz Truss saħqet li l-pajjiż kollu jinsab inkwetat wara li ħarġet din l-aħbar, u insistiet li l-Brittaniċi kollha għandhom fi ħsiebhom lir-Reġina u l-familja tagħha.
Sa nhar it-Tlieta, Truss ġiet maħtura Prim Ministru mir-Reġina Eliżabetta II nfsiha f’Balmoral.
Intant, l-eks Prim Ministru Brittaniku David Cameron esprima t-tħassib tiegħu għal dak li qed iseħħ u saħaq li l-familja rjali tinsab fi ħsiebu.
Ir-Reġina għandha 96 sena u ilha tokkupa din il-kariga għal dawn l-aħħar 70 sena.
Hija għandha erba’ ulied, 8 neputijiet u 12-il pro-neputijiet.
Intant għexieren ta’ persuni nġabru barra l-Kastell ta’ Balmoral f’Aberdeenshire. Numru ta’ uffiċjali tal-Pulizija nġabru wkoll mal-kanċelli tal-Kastell. Dan filwaqt li inevitabbilment membri tal-media nġabru f’Balmoral sabiex jakkwistaw l-aħħar aħbar dwar il-kundizzjoni tar-Reġina.
Dan filwaqt li inġabru wkoll bosta persuni ‘il barra mill-Palazz ta’ Buckingham, b’diversi minnhom imbikkma jistennew fuq ix-xwiek aħbar rigward il-kundizzjoni tar-reġina u uħud saħansitra jqiegħdu l-bukketti tal-fjuri barra r-residenza tagħha fiċ-ċentru ta’ Londra.
Korrispondenti li jinsabu barra Balmoral sostnew li l-indikazzjonijiet kollha qed juru li preżentament għaddejja xi ħaġa serja u li mhux tas-soltu. Madanakollu insistew li qed jittamaw li ma huwa xejn kritiku għajr problema medika li inevitabbilment tistenniha fuq persuna li jkollha ċertu età.
Esperti saħqu li s-sitwazzjoni hija waħda serja ferm wara li tħabbar li ċ-ċerimonja tradizzjonali taċ-Changing of the Guard….ċerimonja li suppost kellha ssir għada quddiem il-Palazz ta’ Buckingham, ġiet ikkanċellata. Huma spjegaw li da huwa sinjal xejn sabiħ.
Bosta messaġġi wkoll minn Mexxejja membri tal-Commonwealth fosthom il-Prim Ministru tal-Kanada Justin Trudeau fejn awgura fejqan ta’ malajr lir-Reġina Eliżabetta. Fost il-messaġġi kien hemm ukoll tal-President Amerikan Joe Biden hekk kif kelliem għall-White House stqarr li l-familja rjali tinsab fi ħsiebhom.
Diversi esperti saħqu li Eliżabetta hija waħda mill-aktar persuni rispettati minn madwar id-dinja u għajnejn il-popli kollha jinsabu fuq ir-Renju Unit, partikolarment fuq l-Iskozja..jistennew u jittamaw għal aħbarijiet pożittivi dwar saħħitha.
Dan filwaqt qed jiġu ppubblikati avviżi li qed iwissi lill-utenti tal-midja soċjali dwar żieda qawwija ta’ fake news li qed jgħidu li r-Reġina mietet. Huma saħqu li din l-aħbar hija għal kollox fażulla.
