L-avukati ta’ sid ta’ bar tal-Qawra akkużat b’omiċidju volontarju wara li ta bis-sieq klijent li kien beda jisgħol fid-drink tiegħu, qed ifittxu li jirkupraw il-pussess tal-ħanut li huwa “l-uniku sors ta’ dħul” tal-akkużat. Munchies Pub, li jinsab fi Triq it-Turisti ilu magħluq minn dik l-għodwa fatali tas-17 ta’ Ġunju meta David Busuttil, is-sid ta’ 59 sena, spiċċa taħt arrest wara li ħabat għal Roger Dudley-Ward ta’ 60 sena, li kien qed jixrob fil-bar meta seħħ argument jaħraq bejn it-tnejn.
Dakinhar il-Ġimgħa filgħodu għall-ħabta tas-1.30 ta’ filgħodu waslet sejħa fl-għassa tal-Qawra, li nfurmat li ambulanza kienet għadha kif sejħet għal persuna li dehret feruta gravi u mitlufa minn sensiha fuq il-bankina fi Triq it-Turisti, qal l-Ispettur Ryan Vella meta xehed fil-kumpilazzjoni tal-qtil.
Ħabib tar-raġel midrub kien avviċina lill-paramediċi u qal li xi ħadd ta daqqa ta’ sieq lill-vittma f’wiċċu hekk kif inxteħet biex jaqbad xi ħaġa, u b’hekk waqa’ lura fit-taraġ ta’ barra l-pub. Uffiċjal tal-pulizija li ngħata struzzjonijiet biex jiċċekkja l-post tal-inċident, ikkonferma li kien hemm “likwidu ħamrani” mifrux fuq il-bankina kif ukoll ħwejjep mxarrba bid-demm.
Waqt li ppruvaw jillokalizzaw lill-ħabib tal-vittma, li deher li biddel l-indirizz, il-pulizija sejħu lil sid il-pub fl-għassa tal-Qawra. Busuttil tfaċċa għall-ħabta tal-5.15am u wara li kkonsulta avukat tal-għajnuna legali, qal lill-pulizija dwar kif Dudley-Ward l-ewwel kien qabad miegħu fuq l-eks sieħba tiegħu u mbagħad sagħal fid-drink tiegħu.
Dan kien meta Busuttil tefa’ x-xarba tiegħu lejn l-allegat vittma li rreaġixxa billi wadda l-bott tal-birra tiegħu lejh, spjega Busuttil. Busuttil imbagħad qal lill-pulizija li kien imbotta lir-raġel l-ieħor li waqa’ fit-taraġ. Kif irrakkonta Busuttil il-verżjoni tiegħu, waslet sejħa mill-Isptar Mater Dei li nfurmat lill-pulizija li l-vittma kienet mietet.
Sussegwentement, is-suspettat akkumpanja lill-pulizija fil-bar tiegħu, u spjegalhom is-sekwenza ta ‘avvenimenti li seħħew biss sigħat qabel. Imbagħad ġie skortat lejn il-kwartieri ġenerali tal-pulizija hekk kif komplew l-investigazzjonijiet.
Dakinhar filgħaxija Dudley-Ward kien liebes arloġġ Rolex isfar u griż u brazzuletta safra bl-iswed. Dawk, flimkien ma’ tliet ċwievet, il-kartiera u l-flus kontanti tiegħu, il-karti tal-bank u tliet karti ta’ sħubija oħra, ingħataw lill-uffiċjal. L-Ispettur Vella esebixxa wkoll tliet ċertifikati mediċi maħruġa dak il-lejl mill-istess tabib li kkura lill-vittma l-isptar.
L-ewwel ċċertifikat li kien qed isofri ġrieħi gravi, it-tieni kien jgħid li kien fil-periklu li jitlef il-ħajtu u t-tielet ċċertifikat li Dudley-Ward kien miet fil-5.20am. Sussegwentement, sid il-bar tressaq il-Qorti, u wieġeb mhux ħati tal-qtil. Huwa ngħata l-libertà proviżorja fl-ewwel seduta wara li tressaq il-Qorti. Busuttil ikkonsulta lill-avukati personali tiegħu qabel ħareġ id-dikjarazzjoni awdjoviżiva tiegħu.
Sadanittant, il-pulizija kisbu evidenza ġdida li titfa’ dawl fuq l-inċident f’Munchies. Filmati wrew lil sid il-bar jimbotta lill-allegata vittma eżatt quddiem xi tarġiet li jinżlu fit-triq. Raġel ieħor daħal u qabad lil Dudley-Ward biex iwaqqafh milli jaqa’, filwaqt li qal lil Busuttil biex jieqaf. Iżda Busuttil ta daqqa ta’ ponn u sieq lill-allegat vittma.
Hekk kif Dudley-Ward inxteħet biex jaqbad it-telefon, sid il-bar reġa’ tah sieq. L-allegat vittma spiċċat fuq il-bankina ta’ taħt. L-avukat difensur Marion Camilleri staqsiet jekk il-pulizija kinitx qed tinsisti li l-pub għad irid jibqa’ magħluq, u sostniet li l-pub kien l-uniku sors ta’ dħul tal-akkużat.
Ix-xhud spjega li kien ippreżenta tweġiba bil-miktub f’dan ir-rigward u kkonferma li ma kien hemm l-ebda oġġezzjoni li l-post jinħeles favur l-akkużat. “Huwa pjuttost urġenti,” spjegat l-avukat lill-maġistrat Doreen Clarke, li osservat li l-qorti tista’ tiddeċiedi biss fuq talba bħal din ladarba jkollha l-proċess verbali li bħalissa kien quddiem il-maġistrat inkwerenti. Il-każ ikompli. L-Ispetturi Shawn Pawney u Ryan Vella qed imexxu l-prosekuzzjoni, assistiti mill-avukat tal-AĠ Nathaniel Falzon. L-avukati Franco Debono u Marion Camilleri huma avukati difensuri.
