Is-Sibt li għadda l-Assoċjazzjoni Maltija tal-Weightlifing organizzat kompetizzjoni tal-Weightlifting li rat 45 rekord nazzjonali jinkissru. L-avveniment ta’ klassifikazzjoni, li se jgħodd bħala avveniment ta’ kwalifika għall-kompetizzjonijiet internazzjonali li ġejjin, kien wieħed importanti kemm għat-timijiet tal-kbar kif ukoll taż-żgħażagħ hekk kif jippreparaw għall-Kampjonati Ewropej tal-Juniors, Challenge 210, il-Kampjonati Ewropej tan-Nazzjonijiet Żgħar u l-Kampjonati dinji tal-Weightlifting.
L-ewwel li bdew kienu l-cadets, fejn l-istudent tal-NSS Nathan Mifsud refa l-aħjar personali wara li kkompeta fis-Slovenja ġimgħa biss qabel. Iż-żagħżugħ ta’ 12-il sena spiċċa b’43 kilo fl-Isnatch u 55kilo fil-clean and jerk, huwa jiżen 42.55kilo u kiser 7 rekords nazzjonali tal-kadetti fil-proċess. Luca Said kiser ukoll 2 rekords nazzjonali tal-kadetti bl-40 kilo clean and jerk u 72 kilo totali fil-kategorija 61 kilo.
Id-diviżjoni tal-irġiel rat lill-atleta żgħażugħ Rylee Borg, jirbaħ il-grupp snatch ta’ 101 kilo u clean and jerk ta’ 125kilo. Borg ta’ 16-il sena, refa snatch, clean and jerk u total u mhux biss kienu kollha l-aqwa personali, iżda wkoll rekords nazzjonali. Filwaqt li Rylee iddomina l-kategorija tiegħu, l-atleti rġiel ewlenin l-oħra kienu sfortunati dakinhar. L-atleta ewlieni tal-kbar attwali, Anton Micallef, sofra injury f’idejh il-ġurnata ta’ qabel l-avveniment u kellu jirtira. Filwaqt li Shaun Ciantar irnexxielu biss tentattiv wieħed ta’ Snatch u falla t-tentattivi clean and jerk.
Fil-grupp tan-Nisa, it-tfajliet żgħażagħ kollha ta’ livell għoli kkompetew fl-aħħar avvenimenti tal-ġurnata. Bla ebda sorpriża, l-atleta żagħżugħa ewlenija attwali tad-dinja, Tenishia Thornton, spiċċat bl-aqwa rekords personali kollha fil-kategorija ta’ 59kilo. Wara li refgħet b’suċċess 76kilo, 78kilo u 80kilo fl-Isnatch, kif ukoll tentattiv adizzjonali ta’ 82kilo u b’hekk kisret ir-rekord nazzjonali tad-59 kilo. Iż-żagħżugħa ta’ 17-il sena qed tiprepara għall-kampjonat Ewropew tal-Juniors U-20 fix-xahar ta’ Ottubru. Ir-riżultat ta’ din il kompetizzjoni kien biżżejjed sabiex Thornton tikseb kwalifikazzjoni diretta għall-kampjonat tad-dinja tal-kbar li huma kwalifikazzjoni gћall-Olimpjadi.
Iċ-Champion Ewropea preżenti taż-Żgħażagħ ta’ taħt il-15-il sena, Kim Camilleri Lagana, irnexxielha wkoll tagћmel l-aħjar snatch personali b’51kilo u spiċċat bi 63kilo fil-clean and jerk. L-atleti żgħażagħ, Aaliyah Gatt, Kaya Curmi Inguanez u Mariah Bugeja kellhom ukoll kompetizzjoni eċċellenti. Gatt spiċċat bl-aqwa punteġġi personali wara li refat 49kilo fi snatch u 65kilo fil-clean and jerk wara li gћada kemm ikkompetit fis-Slovenja l-ġimgħa li għaddiet. Curmi Inguanez irnexxiela 47kilo fis-snatch u 58kilo fil-clean and jerk, filwaqt li Mariah Bugeja rnexxielha l-aћjar personali bi snatch ta’ 60kilo.
L-MWA se tkompli l-iskeda impenjattiva tagħha għall-bqija tal-2022 bil-European Juniors li jmiss f’Ottubru fl-Albanija, Challenge 210 f’Ottubru wkoll fl-Iżvizzera, il-European Small Nations f’Novembru f’Ċipru u l-kampjonati tad-dinja f’Diċembru fil-Kolombja.
