Ukren ta’ 31 sena li kien ingħata sentenza sospiża wara li f’Awwissu li għadda kien seraq aktar minn elfejn ewro mill-kaxxa tad-donazzjonijiet tal-knisja ta’ Santa Tereża f’Birkirkara u jumjen wara kien reġa’ tressaq il-Qorti fuq serq ta’ karozza ġie kundannat tliet snin ħabs.
Ihor Cardaci ammetta l-akkużi kollha miġjubin kontrih li kienu jgħoddu għal 13-il waħda. Il-maġġoranza tal-akkużi huma marbuta ma’ serq fejn huwa qal lill-Qorti li kien jisraq biex imantni lil oħtu fl-Ukrajna. Huwa ammetta li f’Awwissu li għadda seraq karozza f’Birkirkara u prova jisraq oħra.
Ammetta wkoll li seraq diversi oġġetti u li għamel ħsara fuq karozza u li baqa’ dieħel bil-karozza f’bus stop f’San Pawl il-Baħar. Fortunatament fil-ħin tal-inċident ma kienx hemm nies jistennew tal-linja. Ir-raġel ammetta wkoll li għamel ħsara f’garaxx f’Birkirkara, li saq karozza b’mod perikoluż u li kien taħt l-influwenza tax-xorb mingħajr liċenzja tas-sewqan u mingħajr polza ta’ assigurazzjoni, li għex ħajja ta’ għażż u ta’ vagabundaġġ.
Il-Qorti, ippreseduta mill-Maġistrat Donatella Frendo Dimech, għamlet diversi kunsiderazzjonijiet dwar is-sentenza fosthom li qieset li l-akkużat wera kooperazzjoni mal-awtoritajiet investigattivi u li rrikonoxxa li żbalja li dan kollu għamlu biex imantni lil oħtu fl-Ukrajna.
Madankollu qieset ukoll li wettaq ir-reati jumejn biss wara li ngħata opportunità mill-Qorti permezz ta’ sentenza sospiża. Il-Maġistrat qalet li waqt li għandu bżonn l-għajnuna din għandha tingħata mhux a skapitu tal-komunità. Dwar l-attentat ta’ serqa ta’ karozza, il-Qorti nnotat li waqaf minn rajh u għalhekk ma laħaq għamel ebda att li jista’ jitqies bħala reat. Innotat ukoll li ma jistax jitqies bħala reċediv.
Il-Qorti wara li sabitu ħati fuq ammissjoni tiegħu stess, ikkundannatu 20 xahar ħabs u ma’ dawn żiedet is-16-il xahar ħabs tas-sentenza li kellu qabel. Huwa ġie ordnat ukoll iħallas €1,820 fi spejjeż u tpoġġa taħt ordni ta’ trattament għal sena biex jegħleb il-vizzju tax-xorb. Il-Prosekuzzjoni tmexxiet mill-Ispettur Christabelle Chetcuti.
