L-awtoritajiet fir-Russja qalu li arrestaw tmien persuni b’konnessjoni mal-isplużjoni tas-Sibt li qerdet parti mill-pont li qed jgħaqqad lir-Russja mal-penisola tal-Krimea u li kien inbena bħala proġett għal qalb il-President Russu Vladimir Putin.
Is-servizzi tas-sigurtà tal-FSB qalu li ħamsa mill-arrestati huma Russi, u li l-oħrajn ġejjin mill-Ukrajna u l-Armenja.
Iżda waqt li r-Russja mill-ġdid qed takkuża lill-Ukrajna għall-attakk fuq il-pont, il-kelliema fi Kiev irredikolaw l-akkuża bħala ‘ħaġa li ma tagħmilx sens’.
L-isplużjoni fuq il-pont qed titqies bħala disfatta simbolika għal Putin li kien inawgurah fl-2018 – bl-istess President Russu jesprimi rabja għal ‘azzjoni intiża biex teqred parti importanti tal-infrastruttura ċivili ta’ pajjiżu’.
Uffiċjali tal-FSB, intant, qalu li l-isplużjoni ‘kienet organizzata mid-Direttorat Ewlieni għas-Servizzi Sigrieti mal-Ministeru Ukren għall-Affarijiet Barranin – kif ukoll mill-Kap tad-Direttorat Kyrylo Budanov, bl-għajnuna tal-istaff u l-aġenti tal-entità’.
Ir-Russi qed jallegaw li l-isplussivi twasslu bil-baħar mill-port Ukren ta’ Odessa lejn il-Bulgarija u l-Ġorġja u li mbagħad ittieħdu bi trakk lejn ir-Russja min-naħa tal-Armenja.
L-Ukrajna, iżda, fissret il-pont bħala struttura falza oħra li qed isservi lir-reġim ta’ Putin u li l-Gvern fi Kiev mgħġandux jikkummenta dwar dawn l-akkużi.
Fi żviluppi oħra, iċ-ċivili fl-Ukrajna mill-ġdid spiċċaw mira ta’ vjolenza – b’talanqas għaxra jinqatlu waqt attakk fuq suq fil-belt ta’ Avdiivka.
Il-kap militari għar-reġjun ta’ Doneetsk, Pavlo Kyrylenko, qal li l-attakk seħħ f’ħin meta s-suq kien ippakkjat bin-nies u fejn anki rriżultaw diversi midruba. Parti mir-reġjun hu okkupat mir-Russi u Kyrylenko ħareġ direttiva għall-evakwazzjoni tar-residenti kollha mill-inħawi.
Sadanittant, numru ta’ nies, inkluża tifla ta’ sitt snin, indarbu serjament waqt bumbardamenti tar-Russi fuq Nikopol, fir-reġjun ta’ Dnipro. Dan waqt li diversi missili tat-tip S-300 niżlu fuq Zaporizhzhia, — b’missila minnhom teqred bini residenzjali f’sobborg ta’ din il-belt.
Instemgħu anki l-isplużjonijiet f’Kherson, li hi fost l-akbar bliet Ukreni li għadha taħt l-okkupazzjoni tar-Russi. Intant ma kienx ċar x’wassal għall-isplużjonijiet u meta l-militar Ukren kompla javvanza mir-reġjun, fejn, fl-aħħar sigħat, ħataf lura l-kontroll f’ħames zoni oħra ta’ pajjiżu.
