Rapport ta’ Colin Schembri
Fusion Meridianbet 33
Starlites FIJO 84
(13-18)(2-27)(9-25)(9-14)
Starlites FIJO fetħu l-impenji tagħhom fil-kampjonat b’rebħa kontra t-team ta’ Fusion Meridianbet. It-team ta’ Fusion huwa magħmul kważi kollhu minn players barranin u għalekk peress li r-regoli jippermettu biss player barranija waħda, l-partiti tagħhom ma jgħoddux għall-klassifika. Starlites kienu kważi bl-istess skwadra tal-istaġun li għadda bil-bidla fit-tmexxija hekk kif Charles Bonnici ħa post Sandro Farrugia u tilfu lil Kay Portelli li reġgħat lura ma’ Luxol u kkonfermaw lill-Amerikana Amelia Simmons. Kif mistenni, Starlites fetħu tajjeb għalkemm fl-ewwel sessjoni Fusion żammew il-pass magħhom. Kienet Maria Bonett li għamlet l-ewwel punti flimkien ma’ Andie Saliba u Christina Curmi għal skor ta’ 12-4. Hawn Fusion kellhom mument tajjeb bil-punti ta’ Natalija Pejcic u Marija Mancilevic u naqqsu d-distakk għal punt 13-14. Starlites wieġbu bil-punti ta’ Steffi De Martino u Simmons biex temmew l-ewwel sessjoni 18-13 minn fuq. It-tieni taqsima kienet storja differenti hekk kif Starlites għamlu 24 punt mingħajr risposta. Huma kellhom fost l-oħrajn il-baskets minn De Martino flimkien ma’ Michela Zammit Cordina, Mikela Riolo, Kaya Mifsud, Bonett u Simmons. L-uniku basket ta’ Fusion ġie minn Adriana Caballero biex Starlites għalqu s-sessjoni bi trippla ta’ Catherine Cilia għal skor ta’ 45-15. L-andament tal-partita baqa’ l-istess fejn Starlites komplew bi break ta’ 16-2 maqsum bejn De Martino, Simmons u Riolo. Fusion wieġbu bil-punti ta’ Milica Stefanovic li kellha wkoll trippla għal skor ta’ 70-24. Fl-aħħar taqsima l-punti naqsu hekk kif Starlites kienu fil-kontroll assolut għalkemm kien hemm spazju għal tlett trippli minn Fusion u tnejn ta’ Starlites li rebħu l-partita 84-33.
Fusion Meridianbet: V. Janicijevic, D. Debono, M. Mancilevic 5, M. Stefanovic 10, D. Apostolovska, E. Amorin 2, A. Caballero 2, J. Simic 4, N. Pejcic 10.
Starlites FIJO: M. Zammit Cordina 11, M. Riolo 7, A. Saliba 5, S. Farrugia, M. Bonett 8, S. De Martino 14, M. Fenech 1, A. Simmons 17, C. Cilia 5, K. Mifsud 2, S. Davies 4, C. Curmi 10.
Referees: Daniella Torok, Nicky Azzopardi, Gianfranco Russo
