Birkirkara vs Ħamrun Spartans | Is-Sibt fit-15:00 fl-Istadium Nazzjonali
Il-partita tal-ġimgħa mis-seba’ ġurnata tal-Kampjonat BOV Premier hija dik bejn l-ewwel żewġ timijiet fil-klassifika, Birkirkara u Ħamrun Spartans li mistennija tiġbor ammont sabiħ ta’ partitarji f’Ta’ Qali. L-Istripes fl-aħħar partita waqqgħu l-ewwel punti wara sitt partiti kontra t-tim ta’ taħthom Gudja United biex issa se jkunu qed jibdew dan il-konfront b’żewġ punti taħt il-leaders Ħamrun Spartans. Iż-żewġ timijiet jidher li se jkunu qed jilgħabu bl-aqwa formazzjoni possibli hekk kif m’għandhom l-ebda plejer sospiż kif ukoll imweġgħa. Ħamrun minn naħa tagħhom għadhom bir-rekord perfett fejn ir-rebħa kontra Valletta kienet is-sitt waħda minn sitta tal-istaġun u għandhom bżonn biss punt biex jibqgħu fil-ċuċċata. Minkejja dan wieħed jistenna logħba bilanċjata bejn dawn it-timijiet li s’issa urew li għandom l-aħjar skwadri tal-kampjonat.
Mosta vs Valletta | Is-Sibt fil-17:15 fl-Istadium Nazzjonali
Fit-tieni partita tas-Sibt fl-Istadium Nazzjonali, Mosta jilgħabu kontra Valletta. Mosta fl-aħħar partita kontra Floriana kienu sfortunati li ma kisbux tliet punti hekk kif il-penalty ta’ Clayton Failla fit-80 minuta kien salvat minn Kitanov u b’hekk kellhom jikkuntentaw b’punt fi draw ta’ 1-1. Huma jinsabu f’nofs il-klassifika bi 8 punti daqs l-istess Floriana. Valletta minn naħa l-oħra se jkunu ġejjin minn tliet telfiet konsekuttivi, bl-aħħar waħda tkun kontra r-rivali Ħamrun Spartans fejn huma wkoll kienu sfortunati fl-aħħar sekondi bl-eks goalkeeper tagħhom Henry Bonello jwettaq save mill-viċin fuq is-sostitut Oke Akpoveta. Għat-tim immexxi minn Thane Micallef, rebħa biss tissodisfhom hekk kif jinsabu fid-disa’ post b’5 punti biss.
Gżira United vs Floriana | Il-Ħadd fit-15:00 fl-Istadium Nazzjonali
Partita oħra interessanti se tkun dik bejn Gżira United u Floriana, b’din tkun l-ewwel waħda tal-Ħadd fl-Istadium Nazzjonali. Gżira jinsabu fil-forma bi tliet rebħiet mill-aħħar tliet ħarġiet, bl-aħħar waħda tkun rebħa konvinċenti ta’ 3-0 kontra Sirens. Gżira għandhom 14-il punt daqs Gudja fit-tielet post tal-klassifika u għalhekk se jkunu qed ifittxu li jżommu l-pass ma’ ta fuq. Floriana minn naħa l-oħra ilhom żewġ partiti bla ma jirbħu, bl-aħħar rebħa tkun kontra r-rivali Valletta. Gianluca Atzori se jkollu nieqes mill-iskwadra lid-difensur Spanjol Christian Rutjens li se jkun qed jiskonta sospensjoni ta’ logħba wara li kontra Mosta tkeċċa wara żewġ karti sofor.
Balzan vs Sirens | Il-Ħadd fil-17:15 fl-Istadium Nazzjonali
Fl-aħħar partita tal-Ħadd fl-Istadium Nazzjonali Balzan se jkunu qed jittamaw li huma wkoll iżommu l-pass ma’ ta fuq hekk kif jilgħabu kontra tim Sirens li jinsabu t-tielet mill-aħħar. Fl-aħħar partita Balzan, għalkemm forsi ħasbu li se tun aktar faċli, kellhom jitħabtu mhux ħażin biex għelbu lil Pietà 3-2 biex b’hekk irritonaw għar-rebħ wara telfa ta’ 2-0 kontra Hibernians. Balzan jinsabu l-ħames bi 12-il punt. Sirens, li kif għedna jinsabu t-tielet mill-aħħar, għadhom bla rebħa mill-ewwel sitt partiti u għandhom biss tliet punti li kisbu minn tliet draws kontra Mosta, Valletta u Floriana.
Żebbuġ Rangers vs Pietà Hotspurs | Il-Ħadd fit-15:00 fit-Tony Bezzina Stadium
Ix-xorti lil Żebbuġ mhi tidqilhom xejn hekk kif minn segwa l-partiti tagħhom s’issa, speċjalment kontra timijiet aktar kwotati minnhom, seta’ jinnota logħob tajjeb mill-iskwarda ta’ Brian Spiteri. Fl-aħħar partita huma tilfu bl-iskor ta’ 1-0 fejn bħal Valletta, fl-aħħar sekondi sabu lill-goalkeeper Pawlist Justin Haber attent li wettaq save mill-isbaħ fuq l-eks plejer taċ-champions attwali Leandro Almeida. Il-Ħadd, Żebbuġ jilgħabu kontra Pietà Hotspurs li għadhom bla punti ankrati fl-aħħar post tal-klassifika. Pietà ukoll urew titijieb fl-aħħar konfront kontra Balzan fejn anke sabu x-xibka darbtejn li iżda ma kienx biżżejjed hekk kif tilfu 3-2. Kif għedna l-ġimgħa li għaddiet, Pietà għandhom bżonn jibdew jakkwistaw il-punti malajr kemm jista jkun sabiex isibu sieqhom fl-għola diviżjoni u jibdew it-triq lejn is-salvazzjoni.
Santa Lucia vs Hibernians | Il-Ħadd fil-17:15 fit-Tony Bezzina Stadium
Fid-derby tan-nofsinhar Santa Lucia jaffrontaw liċ-champions Hibernians hekk kif huma wkoll jinsabu fiż-żona l-ħamra b’punt biss li akkwistaw fl-aħħar konfront kontra Marsaxlokk. Il-fatt li l-Yellows kienu oriġinarjament se jilgħabu fiċ-Challenge League u forsi ma kienux preparati biżżejjed għall-Premier għadu qed jinħass fil-prestazzjonijiet ta’ Santa Lucia. Hibernians wara bidu daqxejn difettuż fl-aħħar żewġ partiti kisbu punti massimi b’rebħiet fuq Balzan u Żebbuġ rispettivament. It-tim immexxi mill-eks Sliema Wanderers Andrea Pisanu għandu 10 punti u jinsab fis-sitt post tal-klassifika.
Gudja United vs Marsaxlokk | It-Tnejn fis-19:30 fit-Tony Bezzina Stadium
Il-partita li se tkun qed tgħalaq is-seba’ ġurnata tal-Kampjonat BOV Premier se tkun dik bejn Gudja United u Marsaxlokk li tintlagħab it-Tnejn filgħaxija fit-Tony Bezzina Stadium. Gudja, li huwa t-tim li s’issa mpressjona bi kbir, issa intlaħqu minn Gżira b’14-il punt wara d-draw fl-aħħar konfront kontra Birkirkara. Madankollu dan ir-riżultat xorta waħda kien wieħed pożittiv għat-tim ta’ Agostinelli li bħal Ħamrun, Birkirkara u Gżira għadu mhux mgħelub. Ix-Xlukkajri ftit ftit qed isibu saqajhom fil-Kampjonat Premier u wieħed jista jipprevedi logħba kkumbattuta anke minħabba l-fatt li Marsaxlokk dehru aktar avventurużi fil-fażi offensiva fl-aħħar logħbiet tagħhom kif ukoll organizzati fid-difiża.
