Il-Lag ta’Como, fit-Tramuntana tal-Italja, ipprovda sfond drammatiku għar-raba u l-aħħar Grand Prix tal-Kampjonati tad-Dinja Voomquest Enemed V2.
It-tlielaq, li seħħew fuq medda jumejn, ma kienux nieqsa minn mumenti drammatiċi. Is-Sibt waranofsinhar it-tim Marine Diffusion ta’ Jesmond Aquilina u Christian Galea daru u nqalbu. Fortunatament ma ġarbu ebda ġrieħi u d-dgħajsa għaddiet minn lejl twil ta’ xogħol mit-tim biex tkun lesta fil-ħin għall-provi ta’ filgħodu. Wara l-iskrutinju, id-dgħajsa tqieset tajba biex ittellaq.
Bit-titlu tal-Kampjonat tad-Dinja fil-qrib, Clive Butler u Sammy Grim, tat-tim El Diablo ħadu l-vantaġġ wara li telqu fit-tieni post mill-pole position. Huma ġew segwiti mid-dħul tal-wild card Team Chaudron tal-fundatur ta’ Voomquest Aaron Ciantar u Ryan Micallef, li minħabba diffikultajiet tekniċi tilfu l-pole position. Minkejja dan irnexxielhom iżommu t-tieni post, segwiti mit-tim Interceptor Remax, misjuq minn Michael Xuereb u Sam Howes.
Nhar il-Ħadd, bit-titlu tal-Kampjonat aktar viċin tagħhom, El Diablo komplew is-sensiela tar-rebħ meta ħadu l-vantaġġ u spiċċaw fil-quċċata tal-klassifika. Warajhom kien hemm Team Chaudron, segwit minn Interceptor Remax, Marine Diffusion u Cutting Edge.
Il-klassifikazzjoni finali għall-Kampjonat tad-Dinja ta’ din is-sena rat lit-timijiet Interceptor Remax u Cutting Edge jieħdu t-tieni u t-tielet post fuq il-podju.
It-tiġrijiet f’Como jġibu fi tmiemha ġirja ta’ suċċess għall-organizzazzjoni Maltija Voomquest, li reġgħet lura għat-tlielaq wara waqfa ta’ sentejn minħabba l-pandemija tal-Covid-19.
“Huwa sempliċiment kbir u soddisfaċenti li tkun tista’ terġa’ lura għat-tlielaq. L-entużjażmu u l-enerġija jkomplu jiżdiedu u hekk qed jiżdied l-interess lil hinn minn xtutna. Hekk kif issa kkonkludejna l-Grand Prix finali għall-2022, diġà qed naħdmu lejn il-Kampjonati tad-Dinja tas-sena d-dieħla li jwiegħdu li jkunu ugwalment eċċitanti u ta’ firxa wiesgħa” irrimarka Aaron Ciantar, fundatur ta’ Voomquest.
