Dalgħodu Repubblika preżentat ilment formali bil-miktub lil Charles Dalli u Norma Saliba, Editur u Kap tal-Aħbarijiet tal-PBS rispettivament, dwar rappurtaġġ qarrieqi li deher ilbieraħ fuq l-istazzjon Nazzjonali dwar ir-rikors li għamel l-Avukat tal-iStat marbut mad-deċiżjoni li tat il-Qorti Kostituzzjonali dwar ir-rekuża tal-Maġistrat Nadine Lia, fejn ordnat it-tneħħija ta’ din il-Maġistrat mill-każ ta’ sfida li qed tagħmel Repubblika kontra l-Kummissarju tal-Pulizija dwar il-passi li naqas milli jieħu fuq l-Inkjesta dwar l-operat tal-Pilatus Bank.
“L-unika revoka li ordnat il-Qorti Kostituzzjonali f’dan il-każ hi dik mitluba minn Repubblika. Ir-rappurtaġġ tal-PBS iwassal il-messaġġ oppost.”
REPUBBLIKA saħqet li l-poplu Malti jixraqlu jkun infurmat bil-fatti kif verament huma mill-istazzjon Nazzjonali u mhux bil-fatti manipulati u maqbluba rashom ‘l isfel. Għaldaqstant Repubblika talbet lis-Sur Dalli u lis-Sinjura Saliba biex minnufih u fit-terminu stabbilit bil-liġi jirrappurtaw fedelment dak li verament irrevokat il-Qorti lbieraħ l-21 t’Ottubru 2022.
“Huwa inaċettabbli li l-istazzjon tax-xandir nazzjonali għadu jippersisti f’dawn it-tattiċi ta’ qerq li huma intiżi li jaġevolaw lill-gvern u li jċaħħdu lill-Poplu mill-verita’ tal-fatti.”
