L-attakkant ta’ Gżira United, Jefferson de Assis, intgħażel bħala l-BOV Plejer tax-Xahar għal Awwissu u Settembru 2022, u b’hekk kiseb l-ewwel unur individwali tal-istaġun tal-futbol attwali.
L-attakkant Brażiljan ta’ 27 sena skorja total ta’ sitt gowls f’dan il-perjodu, li kienu magħmula minn tliet doppjetti kontra Santa Luċija, Gudja United u Hibernians rispettivament.
Jefferson kien f’vena mill-aqwa fl-ewwel logħba tal-istaġun meta skorja darbtejn fir-rebħa ta’ Gżira fuq Santa Lucia bl-iskor ta’ 3-1. Wara lil Gudja fetħu vantaġġ ta’ żewġ gowls, De Assis naqqas id-distakk wara kross mill-viċin ta’ Clive Gauci, u wara gowl ta’ Maia li ġab l-iskor indaqs, Jefferson tefa’ bir-ras il-freekick ta’ Jackson Mendoza għal vantaġġ ta’ 3-2 qabel ma Gudja salvaw punt meta kisbu d-dro ħames minuti mit-tmiem.
Gżira ħadu t-tliet punti kontra Hibernians fejn Jefferson skorja ż-żewġ gowls fir-rebħa tagħhom ta’ 2-1, f’partita fejn ġie vvutat ukoll bħala l-BOV Plejer tal-Logħba.
Priscilla Attard, Manager tal-Fergħa tal-Gżira tal-Bank of Valletta, ippreżentat it-Trofej tal-BOV Plejer tax-Xahar għal Awwissu u Settembru 2022 lil de Assis li għażel lil Caritas Malta biex tibbenefika mid-donazzjoni assoċjata ma’ dan il-premju.
