It-tliet timijiet Maltin li qiegħdin jirrapreżentaw lil Malta fil-kampjonati mondjali tal-pool ikkwalifikaw għal-fażi suċċessiva u jinsabu fost il-favoriti li jagħmluha sal-finali.
It-tim Malti tal-irġiel kiseb l-aħħar żewg rebħiet importanti fil-fażi tal-gruppi meta għeleb lill-Iskozja bl-iskor kbir ta’ 19-2 u lill-Mauritius 11-10. Grazzi għal dawn iż-żewġ rebħiet it-tim Malti kkwalifika għall-kwarti tal-finali li ser jintlagħabu aktar tard illejla. Malta ser taffaċja lil Franza bil-logħba tibda fit-20:30.
It-timijiet Maltin taż-żgħazagħ u l-Over 50’s ukoll kisbu post fis-semi finali tal-kategorija rispettiva tagħhom. It-tim tal-Under 25’s għeleb lill-Irlanda u l-Irlanda ta’ Fuq bl-iskor identiku ta’ 5-4 u meta għad jonqos logħba għat-tmiem tal-fażi tal-gruppi jinsab ċert minn post fis-semi-finali li ser tintlagħab għada fl-10am.
Fl-logħba deċisiva it-tim Malti tal-Over 50’s kiseb rebħa ta’ 13-12 kontra Skozja u qata passaġġ għas-semi finali kontra t-tim nazzjonali tal-Indja bil-logħba tintlagħab għada fis-13:00.
Fil-kampjonati individwali tal-kategorija Over 50’s Brian Grech, Antione Aquilina u Ray Caruana jinsabu fil-fażi tal-aħħar sittax u ser ikun impenjati aktar tard illejla fit-20:30.
Scott Muscat jinsab fis-semi-finali tal-kategorija individwali taż-żgħazagħ Under 25’s u ser jilgħab kontra Morgan Thomas tal-Irlanda għall-post fil-finali tal-kampjonati mondjali tal-kategorija.
Ryan Pisani u Gary Carr ikkwalifikaw għall-kwarti tal-finali tal-kategorija tad-doubles tal-irġiel u ser jiltaqgħu kontra l-professjonisti Declan Brennan u Ronan Mccarthy il-lejla fis-18:00.
Il-koppja Maltija Ray Caruana u Antione Aquilina għaddew għas-semi finali fil-kompetizzjoni doubles tal-Over 50’s u ser ikunu impenjati għada fit-15:30.
Sadanittant it-tim Malta tal-irġiel ha sehem fil-World Team Shootout u spiċċa megħlub fil-finali kontra t-tim nazzjonali tal-Irlanda ta’ Fuq.
