Il-Partit Nazzjonalista ressaq mozzjoni fil-Parlament favur il-bilanċ bejn il-ħajja u x-xogħol…sabiex verament il-poplu jkollu ħajja li tixraqlu, b’dinjità li huwa tieghu bi dritt.
Sostniet dan il-Kelliem tal-Partit Nazzjonalista għall-Ugwaljanza u Drittijiet għat-Tfal Graziella Attard Previ f’diskors li indirizzat fil-Każin tal-Partit Nazzjonalista fiż-Żurrieq waqt attività politika. Hija saħqet li l-Partit dejjem ħadem favur ir-ruħ soċjali, ruħ li min jilleġiżla għandu obbligu li josservaha b’mod konsistenti.
Graziella Attard Previ saħqet li l-Partit Nazzjonalista jrid itejjeb il-ħajja ta’ eluf ta’ familji Maltin u Għawdxin. Hija saħqet li f’pajjiżna l-inugwaljanza ekonomika jeħtieġ li tiġi indirizzata u dan isir biss billi l-isparpaljar frivolu minn naħa tal-Gvern jintemm u verament iħares lejn il-ħtiġijie tal-poplu.
Hija insistiet li l-Partit Nazzjonalista jġib l-interessi tal-bniedem l-ewwel fost oħrajn bil-mozzjoni ppreżentata fejn fost oħrajn ġie propost li jiżdied il-leave tal-paternità u ta’ dawk li jindukraw.
Dan filwaqt li l-kelliem tal-Finanzi għall-Partit Nazzjonalista, Jerome Caruana Cilia sostna li il-budget indirizzat matul il-jum ta’ Tnejn kellu punti tajbin iżda insista li issa qed jittama li dawn jitwettqu.
Huwa insista pero li dan kien budget li ma indirizzax l-isfidi fit-tul u stqarr li kien qed jistenna l-mudell ekonomiku ġdid li tant ilu jħambaq fuqu l-Ministru Clyde Caruana.
Jerome Caruana Cilia sostna li d-den taħt Gvern tal-Labour qiegħed jiżdied u insista li l-ħela minn naħa tal-Gvern mhux tonqos trid imma tieqaf.
Huwa saħaq li l-Gvern irid bis-serjetà jġib il-persuna l-ewwel u qabel kollox iżda minflok qed jagħżel fost oħrajn li jibqa’ jroxx il-flus lil Steward Healthcare…mingħajr is-servizz adegwat li jixraq lill-poplu.
Huwa temm jgħid li dan kien budget mingħajr sustanza fejn baqa’ ma indirizzax fost oħrajn l-eżodu taż-żgħażagħ u n-nuqqas ta’ infermieri.
