Miljun ewro f’sigurtà fir-Residenza San Vinċenz de Paul huwa insult għar-residenti u qrabathom, bl-anzjani ġabuhom priġunieri f’darhom stess.
Hija din id-deskrizzjoni li ta l-editur tal-ġurnal Times of Malta dwar is-sitwazzjoni li spiċċat fiha din ir-residenza tal-anzjani, iffinanzjata kollha kemm hi mit-taxxi tal-poplu.
Kollox beda meta ftit tax-xhur ilu Carmelo Fino, anzjan ta’ 83 sena li kien isofri mill-kundizzjoni tad-dimensja, ħareġ mir-residenza f’nofs ta’ lejl u għeb għal kollox sabiex ftit tal-ġimgħat wara instab bla ħajja f’għalqa f’Birżebbuġa.
L-inkjesta xeħtet ir-responsabbiltà fuq il-ħaddiema li kienu xogħol f’dik il-lejla. Madanakollu, kompla l-editur, ir-responsabbiltà aħħarija kienet tat-tmexxija u l-Ministeru li m’għamlux risk management adegwat.
U s-soluzzjoni għal dan kollu tal-Ministru Jo Etienne Abela hi li fi 3 xhur jonfoq ‘il fuq minn miljun ewro f’miżuri ta’ sigurtà fejn saħansitra qed iħaddem 5 kumpaniji tas-sigurtà biex joqgħodu għassa mal-post…u mar-residenti.
L-editorjal iddeskriva r-residenza bħala ħabs virtwali għall-aktar persuni vulnerabbli f’pajjiżna…mingħajr rispett lejn id-dinjità ta’ min joqgħod hemm.
Resident li tkellem mal-ġurnal saħaq li qed iħossu li qed iqatta’ l-aħħar xhur ta’ ħajtu f’ħabs..mingħajr qatt ma wettaq reat.
Ġie spjegat ukoll li sar eżami fuq ir-residenti fejn ħareġ li madwar 100 minnhom jistgħu jidħlu u joħorġu x’ħin iridu.
L-editur temm jgħid li lill-anzjani tagħna għandna nieħdu ħsiebhom b’mod adegwat u mhux narrestawhom, bl-unika alternattiva tkun din il-miżura drastika – imħallsa mit-taxxi tal-poplu – mingħajr rispett u dinjità lejn dawk li tant ħabbewna u tant għandna ngħożżu.
