Claudette Buttigieg, PN
Id-deputat Nazzjonalista Claudette Buttigieg qalet fil-parlament li nuqqas ta’ investiment fis-saħħa se jnaqqas diversi servizzi essenzjali għall-pazjenti.
Fil-parlament Claudette Buttigieg qalet li, aktar milli fuq il-budget, il-poplu qed jitkellmu fuq id-dikjarazzjonijiet tal-assi tal-ministri għax in-nies bdew jaqtgħu qalbhom minn dak li jista’ joffrilhom il-gvern.
Hi sostniet li l-gvern ma pprovda l-ebda soluzzjoni għat-traffiku; li qed iġib diversi problemi fosthom ta’ saħħa mentali.
Fin-nefqa rikorrenti fis-saħħa l-gvern marċ żmerċ b’€516-il miljun, sostniet Claudette Buttigieg, li qalet li l-gvern ikkalkula ħażin biex, fost l-oħrajn, l-istretġija fuq id-dijabate se jkollha inqas flus ivvutati.
Claudette Buttigieg kompliet li hemm pazjenti li għandhom bżonn kura fl-għajnejn qed ikollhom imorru għand il-Community Chest Fund għax mhux jingħataw servizzi mill-gvern.
Hi appellat biex il-gvern jispjega l-kuntatt tal-ambulanzi li qed jinkrew meta jagħmel iktar sens li dawn jinxtraw.
In-nefqa kapitali se tonqos bi €17-il miljun fl-onkoloġija u fis-saħħa mentali fl-Isptar Monte Carmeli u hemm inċertezza kbira dwar id-dijabate.
Hi appellat ukoll biex tingħata spjega dwar in-nurse navigators fil-kuntest tal-kanċer tas-sider għaliex dan hu sevizz mill-iktar importanti għal dawn il-pazjenti.
Claudette Buttigieg qalet li l-Ministru tas-Saħħa Chris Fearne kien wera tħassib serju dwar Steward u appellat biex għalhekk jittieħdu l-passi meħtieġa b’mod immedjat.
