Il-poplu tal-Istati Uniti qed jivvota fl-elezzjonijiet ta’ nofs il-mandat – magħrufin bħala l-mid-term – u li jiddeċiedu min minn fost id-Demokratiċ fil-Gvern u r-Repubblikani għandhom jikkontrollaw il-Kungress ta’ Washington.
Il-Kungress għandu influwenza kbira fit-tfassil tad-deċiżjonijiet tal-Gvern u meta għal dawn is-sentejn, iż-żewġt ikmamar ( tal-Kungress) — f’dan il-każ is-Senat u l-Kamra tar-Rappreżentanti – kienu f’idejn id-Demokratiċi.
Hu mbassar li r-Repubblikani għandhom jieħdu kontroll tal-Kamra tar-Rappreżentanti, bit-tellieqa għas-Senat qed tidher ferm missielta, bl-ebda partit ma jidher bħala favorit. Ma laħqux daħlu indikazzjonijiet ċari iżda disfatta għad-Demokratiċi f’dawn l-elezzjonijiet għandha tfisser tfixkil, ‘il quddiem, għall-aġenda tal-President tal-Istati Uniti, Joe Biden.
Għaddejjin ukoll elezzjonijiet fuq livell ta’ Stat li kapaċi jwasslu għall-introduzzjoni ta’ liġijiet ġodda dwar l-abort f’xi Stati partikulari.
Dan fost is-sinjali li l-eks President Repubblikan tal-Istati Uniti, Donald Trump, qed iħejji biex iħabbar dalwaqt — u b’mod uffiċjali – li se jikkuntesta l-elezzjonijiet Presidenzjali tal-2024 fl-Istati Uniti.
L-elezzjonijiet tal-mid-term kapaċi anki jagħtu ħjiel dwar l-appoġġ attwali għal Trump minbarra li jipprovdu verdett ċar dwar il-popolarità tal-President Biden. Għaldaqstant, jekk id-Demokratiċi jirnexxilhom iżommu l-poter f’ċerti Stati Amerikani, huma jkunu jistgħu ‘jibnu fuq il-kampanja’ biex Joe Biden ikun elett mill-ġdid bħala President fl-2024.
Mill-banda l-oħra, f’każ li jmorru tajjeb il-kandidati Repubblikani appoġġjati minn Trump, hemm possibbiltà kbira li l-eks President Amerikan ikun ‘ikkonvalidat’ mill-partit tiegħu biex jikkuntesa direttament għall-Presidenza għat-tielet darba.
Dawn il-possibbiltajiet jirrendu l-elezzjonijiet tal-mid-term bħala aktar sinifikanti minn ta’ snin ilu u fejn qed ikunu analizzati mill-qrib anki minn barra l-Istati Uniti. Dan peress li r-riżultati finali jistgħu jiftħu beraħ għall-introduzzjoni ta’ liġijiet ġodda u kontroversjali minbarra li jikkonfermaw il-kompożizzjoni tal-Kungress matul is-sentejn li jmiss.
