Omer Abdella Salih, Eritrean ta’ 25 sena ġie kkundannat ħames xhur ħabs sospiżi għal sena mill-Maġistrat Nadine Lia wara li ammetta li fil-21 ta’ Ottubru li għadda għall-ħabta tas-siegħa ta’ wara nofs inhar seraq e-kick scooter minn Triq il-Karmelitani San Ġiljan.
Fil-Qorti, il-prosekuzzjoni, immexxija mill-Ispettur Keith Xerri spjegat li meta ġie arrestat mill-Pulizija, fl-4 ta’ Novembru li għadda, fuq il-persuna tiegħu nstabet id-droga kokaina. Huwa nstab ħati wkoll li għex ħajja ta’ għażż u vagabundaġġ. Madankollu minn dak iż-żmien ‘l hawn iż-żagħżugħ biddel ħajtu għall-aħjar u li llum qed jgħin lil ħaddieħor li għaddej minn problemi.
Meta ġiet biex tagħti s-sentenza l-Qorti qalet li osservat li l-prosekuzzjoni esebit il-fedina penali ta’ l-imputat li hija netta u li fiha ma jinsabux reġistrati ebda sentenzi kontrih. Il-fatt ukoll li Salih irreġistra ammissjoni, meta tressaq u fl-ewwel oppotunita li kellu.
Qieset il-gurisprudenza tal-Qrati dwar tnaqqis fil-piena meta l-ħati jammetti fi stadju kmieni tal-process u
b’hekk jiffranka ħafna xogħol u spejjeż inutili għall-amministrazzjoni tal-ġustizzja. L-imputat tqiegħed taħt ordni ta’ trattament għal sentejn.
Il-Qorti qieset ukoll li jirriżulta li fiż-żmien tar-reat l-imputat kellu vizzju tad-droga li kien ġabu jirrikorri ghall-kriminalità. Illi filwaqt dan mhuiex skużanti għall-aġir tieghu, huwa kunsiderazzjoni għal Qorti sabiex tikkunsidra
kwalunkwe ordnijiet oħra li tista’ taghti flimkien mal-piena.
Ix-xhieda ta’ l-uffiċjal tal-Probation jirriżulta li illum l-imputat għeleb il-vizzju tad-droga li għandu wara li għamel programmi tad-droga u baqa’ jattendi laqat regolari sabiex dejjem iżomm is-sapport biex ikompli fit-triq it-tajba. Jirriżulta li għandu xogħol fiss, qata l-vizzji u baqa jirriżulta mit-testijiet negattiv għad-droga u bena ħajja ġdida ġewwa Għawdex fejn ħeles mill-kumpannija hażina li kellu qabel.
L-imputat ukoll beda joffri servizzi tiegħu fil-volontarjat u jagħti għajnuna fiċ-ċentri għas-servizzi tad-droga.
Illi dan l-aġir huwa ferm pożittiv u għandu jiġi rikonoxxut għaliex l-imputat wera bl-azzjonijiet tiegħu li rrid ibiddel ħajtu, jiriabilita ruħu, jaghti sehem u kontribut fis-soċjetà u ma jkunx ta’ piħ jew ħsara lejn ħadd.
