Il-President tal-Istati Uniti Joe Biden qed juża s-Summit tal-G20 fl-Indoneżja biex jenfasizza l-importanza li pajjiżu u ċ-Ċina jevitaw konflitt akkost ta’ kollox. It-tensjoni bejn il-potenzi ilha tirranka,bl-issue tat-Tajwan qed tinkwadra bi prominenza — speċjalment wara li l-President taċ-Ċina Xi Jinping insista li din il-Gżira-Stat għandha tispiċċa taħt is-sovranità ta’ Beijing.
L-Istati Uniti hi impenjata biex tiddefendi lit-Tajwan, li ilu għexieren tas-snin jeżerċita stil ta’ tmexxija demokratiku, f’każ li jispiċċa attakkat miċ-Ċina.
Sadanittant – u waqt li l-Mexxejja tal-pajjiżi kienu qegħdin jaslu fl-Indoneżja għas-Summit – Joe Biden u Xi Jinping iltaqgħu f’Bali għall-ewwel taħditiet wiċċ-im-wiċċ mindu tal-aħħar kien laħaq President. Dan fost tamiet li ż-żewġ Mexxejja jiffissaw ‘politika li tillimita l-aġir tal-pajjiżi rispettivi’ fil-konfront tat-Tajwan, f’sitwazzjoni li qed issir dejjem aktar perikoluża u inċerta.
Fl-istess ħin, l-indikazzjonijiet huma li t-taħditiet speċifiċi bejn Biden u Xi Jinping għandhom ikomplu għat-tul taż-żmien – u fost sinjali li l-Mexxejja, issa, iddiskutew anki s-sigurtà ekonomika globali; il-Korea ta’ Fuq komunista u l-invażjoni tal-Ukrajna mill-qawwiet tar-Russja.
Hemm ukoll it-tamiet li l-laqgħa bejn Biden u Xi Jinping ittaffi ftit mit-tensjoni li rrankat bejn iż-żewġ potenzi wara ż-żjara fit-Tajwan, matul is-sajf, tal-Ispeaker tal-Kamra tar-Rappreżentanti Amerikana, Nancy Pelosi.
L-Amministrazzjoni f’Washington fl-aħħar jiem insistiet li qed issegwi politika konċiljatorja maċ-Ċina, bil-President Biden isostni li ż-żewġ pajjiżi jeħtieġu juru li jistgħu jegħlbu d-differenzi waqt li jevitaw li l-kompetizzjoni intensiva twassal għal konflitt militari li minnu ma jibbenefika ħadd.
Joe Biden anki qed jittama li, ‘il quddiem, jikkonvinċi liċ-Ċina dwar il-ħtieġa għal mezzi li bihom hi tista’ taħdem id f’id mal-Istati Uniti fid-diversi setturi.
Il-President Amerikan qed jimpenja ruħu biex iżomm ‘il-linji ta’ komunikazzjoni miftuħin’ ma’ Xi Jinping waqt li qal li d-dinja qed tistenna li l-Istati Uniti u ċ-Ċina jaqdu rwol importanti fl-impenji li jindirizzaw l-isfidi mill-bidliet fil-klima u n-nuqqasijiet tal-ikel fuq livell globali.
Sadanittant – u skont l-aħħar indikazzjonijiet – Xi Jinping qed jidher li qabel ma’ Joe Biden dwar dan u fejn irrikonoxxa li r-relazzjonijiet ta’ pajjiżu ma’ Washington ‘spiċċaw f’sitwazzjoni li qed tqanqal it-tħassib’.
Xi Jinping sostna li l-komunità internazzjonali ma tistenniex li tiffaċċja dawn is-sitwazzjonijiet inċerti u li d-dinja waslet ‘f’salib it-toroq’ – fost ċirkustanzi li jirrikjedu li hu u l-President Amerikan jinnavigaw l-aħjar triq għar-relazzjonijiet bilaterali. Sadanittant, il-President Ċiniż anki wissa lil Biden biex ‘ma jaqbiżx il-linja l-ħamra’ fir-rigward tat-Tajwan.
Kemm Joe Biden kif ukoll Xi Jinping qed iwasslu l-messaġġ li huma jafu eżatt x’hemm fin-nofs waqt li qegħdin jibgħatu s-sinjali lill-komunità globali li huma se jkunu responsabbli fid-deċiżjonijiet li jieħdu.
Intant, wieħed ‘il quddiem irid jara x’inhuma tassew il-pjani ta’ Biden u Xi Jinping, bis-summit ta’ jumejn fl-Indoneżja kapaċi jipproduċi xi ‘sorpriżi’ minn aspett ġeopolitiku.
