Il-Qorti Kostituzzjonali ġiet imħeġġa biex ma tħallix aktar mir-reati li allegatament twettqu minn uffiċjali tal-Bank Pilatus jiġu preskritti b’tattiċi ta’ dewmien. L-Avukat tal-NGO Repubblika Jason Azzopardi għamel it-talba l-Ħamis filgħodu, hekk kif il-Qorti Kostituzzjonali, ippreseduta mill-Prim Imħallef Mark Chetcuti flimkien mal-imħallfin Giannino Caruana Demajo u Anthony Ellul, żammew l-ewwel seduta ta’ kawża mressqa mill-Avukat tal-Istat.
Azzopardi rrimarka li diġà huwa tard wisq biex jitressqu akkużi dwar mill-inqas tnejn mir-reati indikati mill-inkjesta Maġisterjali dwar ħasil ta’ flus fil-bank li issa m’għadux jiffunzjona. L-ewwel reat huwa dak li ssir dikjarazzjoni falza lil awtorità pubblika taħt l-artikolu 188 tal-Kodiċi Kriminali, li ġġorr sentenza ta’ massimu ta’ sentejn ħabs.
It-tieni, dik ta’ sħubija f’organizzazzjoni kriminali bħala Uffiċjal, Direttur jew Maniġer ta’ korp korporattiv, hija punibbli b’bejn erba’ u disa’ snin ħabs, flimkien ma’ multa ta’ aktar minn €116,000. “Fiż-żewġ reati, riżultat tat-tkaxkir tas-saqajn ta’ Nadine Lia, bl-għajnuna tal-Avukat tal-Istat u l-Kummissarju tal-Pulizija, dawn it-tnejn huma preskritti,” qal Azzopardi.
L-avukat qabbel it-trattament tal-uffiċjali tal-Bank Pilatus ma’ dak ta’ persuni li kienu tressqu fil-pront taħt l-istess artikolu 188 fuq skandli tal-VAT u l-VRT, u akkuża lill-Istat li ħa azzjoni biss kontra l-ħuta ż-żgħira, filwaqt li ħalla l-akkużi kontra Antoniella Gauci jiskadu.
“L-Avukat tal-Istat irid li inthom – tliet Imħallfin tkunu kompliċi biex tħallu l-preskrizzjoni tkompli taħdem, tassigura impunità għall-bqija,” qal l-Avukat Azzopardi fil-Qorti, filwaqt li saħaq li ma kienx qed jirreferi għall-avukati preżenti fil-qorti, iżda l-klijent tagħhom li huwa l-Istat.
L-appell tal-Istat huwa kontra sentenza ta’ Ottubru li ngħatat mill-Prim’Awla tal-Qorti Ċivili fil-ġurisdizzjoni Kostituzzjonali tagħha mill-Imħallef Ian Spiteri Bailey, li ordnat lill-Maġistrat Nadine Lia biex tgħaddi temporanjament il-proċeduri ta’ kontestazzjoni li Repubblika kienet ippreżentat kontra l-Kummissarju tal-Pulizija. bħala miżura interim.
Il-każ quddiem il-Maġistrat Lia ġie ppreżentat fid-dawl tan-nuqqas tal-pulizija li taġixxi fil-konfront ta’ numru mill-individwi li ġew imressqa għall-prosekuzzjoni b’inkjesta maġisterjali dwar allegazzjonijiet ta’ ħasil ta’ flus fil-Bank Pilatus.
“X’qed jistenna l-istat grupp ta’ ħallelin?” staqsa Azzopard, hekk kif huwa kkwota lil Santu Wistin. Staqsa lill-imħallfin jekk qattx talbu lil xi parti li talbet ir-rikuża tagħha biex tressaq rikors. Wara li Azzopardi temm jagħmel l-argumenti tiegħu, l-Imħallfin issospendew fil-qosor is-seduta, u rtiraw fl-awli bid-deċiżjoni finali mistennija tingħata nhar il-Ħamis 24 ta’ Novembru.
