Jerome Caruana Cilia, PN
Il-deputat Nazzjonalista u Kelliem tal-Oppożizzjoni għall-Finanzi JeromeJCaruana Cilia, qal fil-parlament li ftit tal-ġimgħat ilu, il-Ministru tal-Finanzi stess ammetta li l-mudell ekonomiku li hu imbotta u kien pjunier tiegħu falla allura jeħtieġ li l-iżvilupp ekonomiku jrid jinbidel u ma nistgħux inkomplu bl-istess riċetta.
Id-deputat Nazzjonalista Caruana Cilia qali li b’ammissjoni tal-Ministru tal-Finanzi stess, ammetta li l-mudell ekonomiku mibni fuq konsum sfrenat mingħajr valur miżjud, ibbażat fuq iż-żieda tal-popolazzjoni mingħajr pjanar u mingħajr viżjoni fit-tul, ironikament fl-iktar pajjiż densely populated fost l-istati membri kollha tal-Unjoni Ewropea u naturalment bil-problemi kollha li dan ġab miegħu, qalilna li jrid jinbidel.
Id-deputat Nazzjonalista Jerome Carunana Cilia qal li għaldaqstant wieħed kien jistenna illi fid-diskors tal-budget il-Ministru tal-Finanzi kien se jindikalna l-viżjoni tiegħu fit-tul, b’mudell ekonomiku ġdid.
Kellu opportunita’ illi mhux biss lilna tal-Partit Nazzjonalista, imma lill-poplu Malti u Għawdxi, jindikalu il-fejn se nieħdu dan il-pajjiż, il-fejn irridu mmorru.
Hu qal li wieħed kien jistenna li l-Ministru tal-Finanzi jgħid x’niċeċ ġodda fl-ekonomija se jkunu qed jinħolqu? X’investiment se jkun qed isir f’industry verticals eżistenti? X’tip ta’ impjeigi ta’ kwalità għaż-żgħażagħ u l-ħaddiema Maltin se nkunu qed noħolqu?
X’tip ta’ setturi li jħallsu pagi tajbin u mhux cheap labour se jkunu qegħdin jinħolqu? Fuq kollox, qal Jerome Caruana Cilia, wieħed jien jistenna x’vizjoni se jkun qed joħloq għaż-żgħażagħ tagħna, dawk is-70% taż-żgħażagħ li qalulna li kieku jistgħu jridu jitilqu għal dejjem.
Jerome Caruana Cilia, qal li f’diskors ta’ aktar minn sagħtejn u nofs, dwar dan ma smajna xejn. Budget bi pjan ekonomiku li diġà falla, mingħajr viżjoni fit-tul. Budget li nesa lill-middle class u budget li ma jindirizzax il-kwalità tal-ħajja li tixraqlek.
Mhux talli l-Gvern m’għandux ideat għall-ekonomija ta’ għada, talli jidher li saħansitra qata’ qalbu li jsolvi l-problemi li ta’ kuljum qed ikissru lill-familji u n-negozji Maltin u Għawdxin.
Id-deputat Jerome Carunana Cilia qal li l-Gvern mhux se jindirizza bis-serjeta’ l-problema tat-traffiku, il-problema tat-tniġġis, in-nuqqas ta’ spazji miftuħa, il-pazjenti f’kurituri, u n-nuqqas ta’ pjanar serju fil-qasam tal-kostruzzjoni.
“Tassew ħasra għaliex il-futur ma jistenna lil ħadd”, tenna Jerome Carunana Cilia, li qal li jeħtieġ ideat ġodda, jeħtieġ inizjattivi ġodda u jeħtieġ viżjoni għall-ġenerazzjonijiet futuri biex iħossuhom entużjasti li jibqgħu f’Malta għaliex Malta se toffrilhom l-aqwa postijiet tax-xogħol fejn il-kwalità hi l-aqwa prijorità.
“Il-futur ma jistenna lil ħadd, ejja naħdmu u jekk hemm bżonn flimkien biex noħolqu niċeċ ekomiċi ġodda u b’hekk nattiraw investiment dirett barrani serju u ta’ livell” tenna Jerome Caruana Cilia.
Hu saħaq li t-trasparenza hi kruċjali u qal li filwaqt li l-Partit Nazzjonalista jaqbel mal-għajnuna kollha li qed tingħata f’sussidji fuq l-enerġija, jiena nistaqsi, jista’ l-Ministru jagħti spjegazzjoni dettaljata ta’ kif qed jintefqu l-miljuni f’sussidji f’dan ir-rigward?
Jista’ jagħti breakdown u jinkludi d-dettalji pertinenti dwar dan, għal din is-sena u s-sena dieħla? Għax veru tajba din, mela meta l-Partit Nazzjonalista, jew anke ħaddieħor, joħroġ b’xi proposta tkunu pronti titolbu għal costings, imma imbagħad fl-iktar line item kruċjali numru 5463, b’total ta’ €580 miljun , intitolat Energy Support Measures, ma tagħtux dettalji, ma’ tagħtux rendikont. Tassew surreali!
Jerome Caruana Cilia tkellem dwar sfidi relatati fil-qasam tat-taxxa, kemm dik diretta u dik indiretta, dwar l-oqsma ta’ RegTech u FinTech, dwar id-dejn nazzjonali, dwar in-nefqa kapitali, dwar il-qasam tan-negozju, dwar l-inflazzjoni u l-mekkanizmu tal-COLA u dwar il-bżonn ta’ riġenerazzjoni ekonomika.
