Il-Ministru tat-Trasport Aaron Farrugia kiteb lill-Ispeaker dwar il-każ tal-ġimgħa li għaddiet meta ma kienx daħal fis-sessjoni plenarja biex iwieġeb mistoqsijiet minkejja li kien fil-bini tal-parlament iżda ma weġibx lill-Oppożizzjoni li llum reġgħet insistiet li kellhom jingħataw tweġibiet wara r-ruling tal-Ispeaker.
Kien il-Whip tal-Oppoizzjoni Robert Cutajar li staqsa x’inhi l-pożizzjoni tal-Ministru Farrugia u tal-Gvern wara r-ruling tal-Ispeaker l-ġimgħa li għaddiet fejn ikkundanna l-atteġġjament tal-Ministru Aaron Farrugia.
Il-Ministru Owen Bonnici qal li meta jingħata ruling ma jkunx hemm sottomissjonijiet iżda l-gevrn se joqgħod mar-ruling.
Il-Whip tal-Oppożizzjoni Robert Cutajar qal li dan ma kienx ruling komuni iżda kien kundanna diretta għax ministru ħarab milli jidħol fil-Kamra. Għall-inqas kellu jkun hawn reazzjoni min-naħa tal-Gvern, sostna Robert Cutajar, li qal li f’dak il-ħin kien daħal il-Kamra propju l-Ministru Farrugia u għalhekk kellu għandu ċans jispjega.
Il-Whip tal-Gvern Andy Ellul qal li l-Ministru Farrugia kien ta raġunijiet għaliex ma daħalx fil-Kamra bil-miktub dwar x’ġara nhar l-Erbgħa.
Il-Whip tal-Oppożizzjoni Robert Cutajar qal li għalhekk dan id-dokument għandu jitpoġġa fuq il-mejda tal-Kamra għaliex il-Ministru Farrugia ma kellux il-kuraġġ imur fil-pubbliku.
Il-Whip tal-Gvern Andy Ellul qal li dan hu diġà pubblikat u kollox se jitpoġġa fuq il-medja tal-kamra.
Fi spjega fuq sit tal-media lokali, il-Ministru Farrugia qal li hu kellu ‘impenji oħra’ nhar it-Tlieta li għadda iżda ma speċifikax x’inhuma dawn l-impenji. Hu qal li kien informa lill-Whip tal-gvern li kien se jasal tard dakinhar u sostna li kien wasal il-parlament ftit wara l-4 p.m. iżda kien waqaf ikellem lil xi ġurnalisti barra l-parlament fejn wieġeb mistoqsijiet. Il-Ministru Farrugia qal li kellu appuntament ieħor għall-ħabta tal-4.20 p.m. u għalhekk ma setax ikun fil-parlament. Ani hawn il-Ministru ma qalx x’kienu l-laqgħat li qed jgħid li kellu.
