Ivan J.Bartolo, PN
Id-deputat Nazzjonalista Ivan J.Bartolo qal fil-parlament li l-piżijiet tad-dejn li l-gvern daħħal f’dan il-budget se jbatuhom il-ġenerazzjonijiet futuri
Ivan J. Bartolo qal li dan hu budget li jdaħħal inkwiet fil-kuntest ta’ dawk li quddiemhom għad għandhom ħajja twila għaliex ma joffrix viżjoni fit-tul. Hu sostna li l-kwalità mhix mibnija f’dan il-budget, sostna d-deputat Nazzjonalista, li kompla li l-kwalità tal-budget hi inkwetatnti għalkemm fih miżuri soċjali tajbin.
Biex dawn jitwettqu id-dejn nazzjonali qed jikber b’rata li h inkwetanti; il-piżijiet li qed jinħolqu llum se jbatuhom il-ġenerazzjonijiet futuri. M’hemm xejn fil-budget li jipprovdi viżjoni ġdida ekonomika biex tibda tbiddel il-viżjoni li hemm llum; li llum dwarha hemm qbil li għandha tinbidel għax dan mhux mudell ekonomiku suffiċjenti.
Id-deputat Nazzjonalista kompla li l-gvern mhux qed jagħmel il-prijoritajiet tiegħu u qed jitfa’ flus f’investimenti fi Steward; investiment li mhux irendi. Il-prijorità għall-Gvern hu l-barrani, sostna Ivan J.Bartolo, li kompla li l-budget mhux jitkellem dwar l-Air Malta u l-futur ta’ din l-ażjenda.
Id-deputat Nazzjonalista kompla li l-kwalità tal-budget għandha twassal għal Malta aħjar fil-futur; il-kwistjoni hi waħda ta’ ippjanar fil-kwalità. Hu qal li l-ġenerazzjonijiet futuri għandhom jinkwetaw u sostna li l-gvern għandu jikkunsidra kemm nies li qed jitilfu l-fiduċja fil-politika; dan il-pajjiż ma jistax ikompli jkabbar id-dejn bla ma jaħseb li m’hu se jiġri xejn.
Id-deputat Nazzjonalista kompla li jridu jittieħdu deċiżjonijiet li jneħħu l-ħela għax hawn wisq ħela ta’ riżorsi.
Ivan J.Bartolo qal li t-tkabbir tad-dejn mhux is-soluzzjoni u kompla li jeħtieġ bidla fl-attitudni u ssir ħidma fl-interess tal-pajjiż. L-investiment għandhom ikunu dawk li jbiddlu t-tendenza li jkompli jiżdied id-dejn.
Hu qal li l-impjegati tal-Air Malta m’għandhomx ċertezza u stabbiltà; ma jafx x’se jiri minnhom. L-Air Malta mhix biss importanti għall-impjegati tagħha jew għat-turiżmu iżda hi importanti għall-investiment lejn il-pajjiż fil-kuntest tal-konnettività, sostna d-deputat Nazzjonalista.
