Claudette Buttigieg, PN
Id-deputat Nazzjonalista Claudette Buttigieg qalet fil-parlament li l-MCESD għandha tkun indipendenti mill-gvern.
Claudette Buttigieg tkellmet dar id-djalogu soċjali u qalet li dan hu aspett difettuż ta’ dan il-gvern għax id-djalogu ma jfissirx li timponi iżda li tisma’ dak li trid.
Hi sostniet li l-imsieħba soċjali huma fundamentali fejn tidħol id-djalogu soċjali u qalet li d-djalogu hu pilastru ewlieni f’demokrazija.
Id-deputat Nazzjonalista kompliet li d-djalogu hu mibni fuq id-diskussjoni u sostniet li l-konsultazzjoni mhux qed issir b’mod kontinwu u mhux qed tkun effettiva.
L-MCESD għandha tkun indipendenti mill-gvern, qalet id-deputat Nazzjonalista, li kompliet li hemm biss erba’ preżentazzjoni fuq il-web-site tal-MCESD meta fil-verità jsiru preżentazzjonijiet f’kull laqgħa.
Il-preżentazzjoni dwar l-Awtorità tal-Kannabis ma kinitx uploaded fuq il-web-site meta f’din il-laqgħa l-imsieħba soċjali appellaw lill-gvern biex l-ewwel ilesti l-qafas legali u soċjali qabel tgħaddi din il-liġi. Is-sitwazzjoni tal-kannabis splodiet fil-pajjiż, sostniet id-deputat Nazzjonalista.
Kwistjoni kbira hi dwar il-presidenza fejn l-imsieħba soċjali jixtiequ li din tkun b’rotazzjoni u li din ma tkunx immexxija biss minn min ikun maħtur mill-gvern.
Id-deputat Nazzjonalsta qalet li din hi proposta pożittiva u qalet li issa li spiċċat l-MEUSC hemm tħassib li d-diskussjoni nqatgħet fuq l-UE.
