Femiċidju ieħor.
Il-Malta Women’s Lobby jesprimu n-niket tagħhom dwar femiċidju ieħor, bil-vittma Bernice Cassar, li nqatlet fl-inħawi ta’ Kordin il-Paola aktar kmieni dalgħodu.
B’dak li kien ippublikat fuq il-media, hu ċar li llum mara, omm ta’ żewġt itfal , kienet maqtula, avolja għamlet diversi rapporti dwar vjolenza domestika lil pulizija, u l-fatt li l-qorti għamlet ordni ta’ protezzjoni fuq il-mara.
Apparti s-sens ta’ niket lejn il-familja tal-vittma, hemm sens b’saħħtu ta’ rabja, rabja li mara oħra mietet b’kawża ta’ femiċidju, kif ukoll rabja għaliex is-sistema falliet mara oħra.
L-awtoritajiet hemm bżonn li jieħdu passi immedjati u effetivi biex jipprevjenu, jipprotegu, u jħarrku fil-każijiet ta’ vjolenza kontra n-nisa u fil-każijiet ta’ vjolenza domestika.
Apparti min hekk, wasal iż-żmien biex Malta timplementa b’mod effettiv l-Istanbul Convention.
Il-każijiet tal-qorti li qegħdin b’lura tal-vjolenza domestika kontra n-nisa iridu jiġu solvuti l-iktar fis possibli, biex jiġi evitat dewmien li ġieli jdum snin, mal-mument li jiġi sotomess il-każ. Hu evidenti li iktar maġistrati jridu jiġu appuntati esklusivament fuq każijiet ta’ vjolenza domestika kontra n-nisa. Bħalissa, kulma hemm maġistrat wieħed appuntat fuq dawn il-każijiet. Dan hu inaċċetabli.
Il-Gvern għandu wkoll iżid il-finanzi tal-entitajiet bħal Aġenzija Appoġġ u s-Servizzi tal-Vjolenza Domestika, sabiex huma jkunu jistgħu jimpjegaw iżjed ħaddiema soċjali biex jassistu n-nisa vittmi ta’ vjolenza domestika.
Hu ta’ imperattiv li l-ordnijiet ta’ protezzjoni temporanji huma mitluba mill-pulizija u maħruġa mill-qorti biex jipprovdu protezzjoni, u li forom oħra ta’ ordnijiet ta’ emerġenza huma disponibbli u aċċesibli.
Billi ma jagħmlux dan, l-istat u l-istituzzjonijiet ikomplu ifallu lin-nisa.
